كەلەسى جىلى 4 مىڭ شەتەلدىك قانداسىمىز قازاقستاندا ءبىلىم الادى
بۇل تۋرالى دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ ءمالىم ەتتى، دەپ حابارلايدى قازاقپارات ءتىلشىسى.
«بىزدە نازاربايەۆ ۋنيۆەرسيتەتىمەن قاتار، ونىڭ مەكتەپتەرى بار. قازاقستان بويىنشا 20 نازاربايەۆ زياتكەرلىك مەكتەپتەرى (ن ز م) جۇمىس ىستەيدى. ولاردىڭ ءبىلىم بەرۋ جۇيەسى ۇزدىك، ياعني حالىقارالىق ستاندارتقا ساي ەكەنى دە بەلگىلى. قازىرگى تاڭدا ن ز م- مەن كەلىسىمگە كەلىپ جاتىرمىز، ونىڭ نەگىزىندە كەلەسى جىلى 4 مىڭ قانداسىمىز، ياعني وقۋشىلار قازاقستانعا كەلىپ ن ز م- دە وقيدى. وسى جوبا اياسىندا بارلىق ەلدەردەگى باۋىرلارىمىزدى قامتيتىن بولامىز، ونداعى ماقسات - ءبىلىم بەرۋدەن بولەك، ولاردى ءوزىمىزدىڭ قازاق بالالارىمەن تانىستىرىپ، جاقىن ارالاستىرۋ. وسىعان ۇقساس بىزدە جىل سايىن 150 شەتەل قازاقتارىنىڭ بالالارى اقمولا وبلىسىنداعى «بالداۋرەن» جازعى لاگەرىندە دەمالادى»، - دەدى دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ.
سونىمەن قاتار، ز. تۇرىسبەكوۆ ءبىلىم بەرۋ جوباسى اياسىندا قانداستارىمىزعا ەلىمىزدىڭ كورىكتى جانە تاريحي جەرلەرىن كورسەتىپ، وتانعا دەگەن سۇيىسپەنشىلىكتەرىن ارتتىرۋ باعىتىنداعى شارالاردىڭ ۇيىمداستىرىلاتىنىن دا ايتىپ ءوتتى.
ايتا كەتسەك، بۇگىن استانادا 10 ەلدەن كەلگەن وتانداستارىمىزدىڭ قاتىسۋىمەن جيىن ءوتىپ، ونىڭ بارىسىندا «الىستاعى اعايىن» تاريحي دەرەكتى فيلمىنىڭ تۇساۋى كەسىلدى.
ودان بولەك، ەرتەڭ قانداستارىمىزدىڭ قاتىسۋىمەن «قاسيەتتى قازاق ەلى» اتتى حالىقارالىق ونەر فەستيۆالى وتەدى.