قازاقستاندىق 4 تاەكۆوندوشى تايپەيدەگى گران-پري تۋرنيرىنە قاتىسادى
اتالعان سىنعا ءتورت قازاقستاندىق سپورتشى قاتىسادى، دەپ حابارلايدى Olympic.kz.
گران-پري باسەكەسىندە ەل نامىسىن جانسەل دەنيز (67 كەلى)، رۋسلان جاپپاروۆ (80 كەلىدەن جوعارى)، نۇرلان مىرزابايەۆ (80 كەلىگە دەيىن) جانە سمايىل دۇيسەباي (87 كەلىگە دەيىن) قورعايدى.
العاش بولىپ اۋىر سالماقتاعى سپورتشىلار - رۋسلان جاپپاروۆ پەن سمايىل دۇيسەباي باق سىنايدى.
«جىل سايىن شامامەن 5-6 گران-پري تۋرنيرى وتەدى. ال بۇل جارىسقا رەيتينگتەگى العاشقى 30 سپورتشى عانا قاتىسا الادى. سوندىقتان، ءبىزدىڭ قۇرامادان رەيتينگتە جوعارى ورىنداردا تۇرعان ءتورت سپورتشى اتتاندى. بيىل گران-پري تۋرنيرىنىڭ فينالدىق كەزەڭى بىرىككەن اراب امىرلىكتەرىندەگى فۋدجەيرا قالاسىندا وتەدى. ءبىزدىڭ سپورتشىلارىمىز فينالدىق سىنعا ءوتۋ ءۇشىن بارىن سالادى»، - دەيدى تاەكۆوندودان ۇلتتىق قۇرامانىڭ اعا باپكەرى باتىربەك ەسداۋلەتوۆ.