ديماش قۇدايبەرگەن دەنيس تەن تۋرالى 4 جان تەبىرەنتەرلىك جازبا قالدىردى

 استانا. قازاقپارات - تانىمال ءانشى ديماش قازاقتىڭ ماڭدايىنا سىيماي كەتكەن وليمپيادا جۇلدەگەرى، قازاقستاندىق مانەرلەپ سىرعاناۋشى دەنيس تەن تۋرالى جان تەبەرەنتەرلىك جازبا قالدىردى.

ءانشى ينستاگرام پاراقشاسىندا كولىك توناۋشى بۇزاقىلاردىڭ قولىنان اجال قۇشقان دوسى تۋرالى جۇرەك ەلجىرەتەرلىك جازبا قالدىردى.

«ەشقاشان وسى جازبانى جازامىن دەپ ويلاماپپىن. مەن بۇعان سەنە الار ەمەسپىن. دەنيس باۋىرىم، دوسىم مەنىڭ سەنىڭ جوعىڭ بىلىنەتىن بولدى... دجەكي دوستىعىنا راحمەت! سەن تاريحتا قالعان ۇلى ادامسىڭ. بۇل ومىردەن ەرتە كەتىپ قالعانىڭ وكىنىشتى. مەن ءاردايىم سەنىمەن ماقتانىپ، ساعىناتىن بولامىن. سەن بۇكىل ءومىرىن ەلىمىزدىڭ يميدجىنە ارناعان باتىرسىڭ! ءبارى ءۇشىن ساعان كوپ راقمەت! مەن وعان سەنگىم كەلمەيدى، سەنە المايمىن. ءبىزدىڭ سوڭعى اڭگىمەمىزدى ەشقاشان ۇمىتپايمىن. جاتقان جەرىڭ جايلى بولسىن. بارلىق تۋىستارىنا جانە دوستارىنا قايعىرىپ، كوڭىل ايتامىن.
قازاقتىڭ نامىسىن قورعايمىن دەپ جانىن، بارىن سالعان ماقتانىشىمىزدى سول جەردە 1 قازاق كومەكتەسپەك تۇگىلى، ءوز قازاعىمىزدىڭ قولىنان جان تاپسىرعانىنا سەنە الار ەمەسپىن. ءبىزدىڭ ۇلتتى الەمگە ۇلىقتاپ، ەلىمىزدى تانىتقان ساۋساقپەن سانايتىنداي از عانا مايتالماندارىمىزدىڭ قادىرىن ءبىلىپ، قورعاپ جۇرسەك بولاتىن ەدى عوي! ناعىز ەرجۇرەك باتىر ەدىڭ دوسىم. سەنىڭ قاراپايىمدىلىعىڭ، ادامي قاسيەتتەرىڭ بارىمىزگە ۇلگى! ەكى ءسوزىڭنىڭ بىرىندە مەنىڭ قازاقستانىم، قازاعىم دەۋشى ەدىڭ. مەنىڭ قانىمدى، ۇلتىمدى، ەلىمدى تانىتقانىڭا مىڭ تاعزىم. سەن ەشقاشان سونبەيتىن جۇلدىزسىڭ! كەشىر ءبىزدى دوسىم! وزەگىم ورتەنىپ بارادى...

چەمپيوندار ولمەيدى، ولار وسى قاتىگەز الەمدى اسپاندى باعىندىرۋ ءۇشىن ارتتا قالدىرادى. سەن ءوزىڭ تۋرالى ءان تاڭداپسىڭ... حوش بول باتىر.

التىن باۋىرىم، كوڭىلى جايساڭ، جۇرەگى كەڭ اسىل دوسىم... كوزىڭنىڭ تىرىسىندە ەلىمىز ءۇشىن جاساعان جاقسىلىعىڭا العىس ايتىپ ۇلگەرمەپ ەدىم. الدىڭدا 1000 مارتە باسىمدى ءيدىم باۋىرىم. ءبىر ارناعا توعىسقان قانشا ماقساتتارىمىز بەن ارماندارىمىز جۇزەگە اسپاي قالدى... Whatsapp-تى اشىپ، ءالى دە سەنەن حات كەلەتىندەي كۇتىپ وتىرامىن... قوش بول ەل ءۇشىن تۋعان التىنىم، - دەگەن ديماش دەنيس تۋرالى جازعان جازباسىندا.