قازاقستاندىق بالۋاندار ازيا بىرىنشىلىگىنىڭ العاشقى كۇنىندە 4 مەدال جەڭىپ الدى

None
None
استانا. قازاقپارات - كەشە ءۇندىستاننىڭ نيۋ-دەلي قالاسىندا ءوتىپ جاتقان جاستار اراسىنداعى كۇرەس تۇرلەرىنەن ازيا چەمپيوناتىن قازاقستاندىق بالۋاندار ءساتتى باستادى، دەپ حابارلايدى قازاقپارات ءتىلشىسى.

ق ر كۇرەس تۇرلەرى فەدەراتسياسىنىڭ باسپا ءسوز قىزمەتى ءمالىم ەتكەندەي، «سارىقۇرلىق» دوداسىنىڭ العاشقى كۇنى بوزكىلەمگە شىققان گرەك-ريم كۇرەسىنىڭ بالۋاندارى بەس سالماقتا جەڭىمپازدار مەن جۇلدەگەرلەردى انىقتادى. جاس بالۋاندارىمىز بۇل سىندا ەل قورجىنىنا ءتورت قولا مەدال سالدى.

55 كەلى سالماقتا كۇرەسكەن ارسلان ابدۋراحمانوۆ جارتىلاي فينالدا ءۇندى بالۋانىنان 10:15 ەسەبىمەن جەڭىلىپ قالدى. ەسەسىنە، قولا مەدال ءۇشىن بولعان ايقاستا جاپون بالۋانىنان باسىم ءتۇستى. تارتىستى وتكەن بەلدەسۋ 8:7 ەسەبىمەن ارسلاننىڭ پايداسىنا شەشىلدى.

63 كەلىدەگى تىلەك اسەمبايەۆ شيرەك فينالدا يراندىق بالۋاننان ۇتىلعانىمەن، قولا مەدال ءۇشىن بولعان بەلدەسۋدە تۇركىمەنستاندىق بالۋاننان 6:1 ەسەبىمەن ايلاسىن اسىردى.

87 كەلىدەگى سانجار تەمىربەك پەن 130 كەلىدەگى انتون ساۆەنكو دا ازيا چەمپيوناتىنىڭ قولا مەدالىنە يە بولدى. سانجار العاشقى اينالىمدا 9:0 ەسەبىمەن وزبەك بالۋانىن جەڭدى. ال جارتىلاي فينالدا قىتاي بالۋانىنان 2:4 ەسەبىمەن ۇتىلدى. قولا مەدال ءۇشىن بولعان شەشۋشى بەلدەسۋدە قىرعىز بالۋانىنا ەش مۇمكىندىك قالدىرعان جوق - 9:0.

اسا اۋىر سالماقتاعى انتون ساۆەنكو ءبىرىنشى بەلدەسۋىندە 1:2 ەسەبىمەن يران بالۋانىنا ۇتىلدى. ءبىراق، قولا مەدال ءۇشىن كۇرەستە قىتاي بالۋانىن 8:0 ەسەبىمەن جەڭدى.

جارىستىڭ ءبىرىنشى كۇنى ساراپقا سالىنعان بەس سالماقتىڭ باس جۇلدەسىنە يران مەن ءۇندىستان بالۋاندارى يە بولدى. يراننىڭ جاس بالۋاندارى 4 سالماقتا (55، 63، 87، 130) توپ جارسا، ءۇندىستانعا 77 كەلى سالماقتىڭ باس جۇلدەسى بۇيىردى. وكىنىشكە قاراي، بۇل سالماقتا كۇرەسكەن داۋلەت جالعاسوۆ جۇلدەسىز قالدى.

ەستەرىڭىزگە سالا كەتەيىك، وسىعان دەيىن اتالعان دودادا كۇرەستىڭ ءۇش تۇرىنەن 30 بالۋان ەل نامىسىن قورعايتىنى تۋرالى ايتقان بولاتىنبىز.

اۆتور: كۇنسۇلتان وتارباي

 

سوڭعى جاڭالىقتار