اقتوبەدە گيننەستىڭ رەكوردىن جاڭارتۋ ءۇشىن 4 مىڭنان استام ادام قان قىسىمىن ولشەتتى
بارلىعى 500 مەديتسينا قىزمەتكەرى الدىن الا دايىندالىپ، ادامداردى قابىلدادى، دەپ حابارلايدى قازاقپارات ءتىلشىسى.
بۇعان دەيىن حابارلاعانىمىزداي، كەشكىلىك اقتوبەلىكتەر دەنساۋلىق ساياباعىنا جينالدى. مۇندا ءبىر مەزەتتە 500 مەديتسينا قىزمەتكەرى تۇرعىنداردىڭ قان قىسىمىن ولشەپ بەردى. گيننەستىڭ رەكوردىن جاڭارتۋ ءۇشىن وبلىستىق دەنساۋلىق ساقتاۋ باسقارماسى وسى جىلدىڭ اقپان ايىندا ارنايى ءوتىنىش جازعان. ال رەكوردتى جاڭارتۋ اكسياسىنا تەك قالا تۇرعىندارى عانا ەمەس، اۋدانداعى مەديتسينا قىزمەتكەرلەرى دە قاتىستى.
«رەكورد جاڭارتۋ وتە سيرەك بولادى. سوندىقتان ۇسىنىس تۇسكەن كەزدە قۋانا قابىلداپ، اكتسياعا قاتىستىق. بىزگە قويىلعان تالاپ بويىنشا اكتسيا كەزىندە ءار مەديتسينا قىزمەتكەرى 10 ادامنىڭ قان قىسىمىن ولشەيدى. ءبىر ادامعا 3-4 مينۋت ۋاقىت بەرىلگەن. نەگىزى ءبىز ادامنىڭ اتى-ءجونىن، جەكە كۋالىكتەگى ءنومىرى مەن بايلانىس تەلەفونىن جازىپ الامىز. كەيىن قاتىسۋشىعا ارنايى نومەر تاعامىز. ەگەر قان قىسىمى جوعارى بولسا، دارىگەرلەردىڭ باقىلاۋىنا جىبەرىلەدى. قولىمىزدا اقپاراتتىق ارنايى جادىناما دا بار»، - دەدى العا اۋداندىق اۋرۋحاناسىنىڭ قىزمەتكەرى عاليا مۇقتار قىزى.
اقتوبەلىكتەر كەشكى ساعات 19:00-دە باستالعان اكسياعا ەكى ساعات بۇرىن جينالدى. ولار الدىمەن جەكە كۋالىگىن بەرىپ، تىركەۋدەن ءوتتى. تىركەلگەن سوڭ وزدەرى قالاعان مەديتسينا قىزمەتكەرىنىڭ جانىنا بارىپ، قان قىسىمىن ولشەتتى. اكسياعا قاتىسۋشىلار اراسىنداعى دارىگەرگە تۇراقتى قارالىپ جۇرگەن ادامدار مەن اق حالاتتىلارعا وتە سيرەك قارالاتىن ادامدار بار.
«ءبىز تاريحتا قالۋ ءۇشىن بۇگىنگى اكسيانى قۋانا قابىلدادىق. ءوزىم قان قىسىمىمدى ءجيى ولشەتپەيمىن، دارىگەردىڭ الدىنا كوپ بارمايمىن. بۇگىن تەكسەرىلىپ، ءبارى قالىپتى ەكەنىن ءبىلدىم»، - دەدى قالا تۇرعىنى تامارا جۇماتوۆا.
اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا، بۇگىن 4 مىڭنان استام ادامنىڭ قان قىسىمى ولشەندى. تالاپ بويىنشا 80 باقىلاۋشى قارادى. ءبارى بەينەكامەراعا ءتۇسىرىلىپ، الداعى ۋاقىتتا جينالعان ماتەريال لوندونداعى گيننەستىڭ رەكوردتار كىتابى كەڭسەسىنە جىبەرىلەدى. جاۋاپ ەكى اپتادان سوڭ بەلگىلى بولماق.
«اقتوبەدە مۇنداي اۋقىمدى شارا ءبىرىنشى رەت وتكىزىلىپ جاتىر. ءبارى جاقسى ۇيىمداستىرىلىپ، ۋاقىتقا ساي اتقارىلاتىن جۇمىس رەتتەلگەن. حالىق وتە كوپ جينالىپ، ۇلەس قوستى. مىندەتتى تۇردە گيننەستىڭ رەكوردىن جاڭارتامىز دەپ ويلايمىن»، - دەدى حالىقارالىق دارەجەدەگى تورەشى بوريس رومانوۆ.
