14:22, 13 - مامىر 2018 | GMT +6
ريم پاپاسىنىڭ كولىگى سۋپەركارى 4 ەسە قىمباتقا ساتىلدى
استانا. قازاقپارات - ريم پاپاسى فرانسيسكتىڭ اق Lamborghini Huracan سۋپەركارى سەنبى كۇنى موناكوداعى Sotheby's اۋكسيوندار ۇيىندە ساتىلدى.
بۇل جايلى ANSA اگەنتتىگى حابارلايدى.
كاپوتىنا ريم پاپاسىنىڭ قولتاڭباسى تۇسىرىلگەن ماشينا 715 مىڭ ەۋروعا، ياعني ءوز قۇنىنان شامامەن 4 ەسە قىمباتقا ساتىلدى.
اگەنتتىكتىڭ حابارلاۋىنشا، اۋكسيوننان تۇسكەن قاراجاتتار قايىرىمدىلىق ماقساتتارعا، اتاپ ايتقاندا حريستياندىقتى ۇستاناتىن بوسقىنداردىڭ يراكقا ورالۋىنا كومەكتەسۋگە جۇمسالادى.
التىن تۇستەس جولاقتارى بار اق اۆتوموبيلدى 2017 -جىلعى قاراشادا ريم پاپاسىنىڭ قابىلداۋىندا بولعان Lamborghini باسشىلىعى سىيعا تارتقان. سول كەزدە- اق پاپا فرانسيسك سۋپەركاردى اۋكسيوندا ساتۋعا شەشىم قابىلداعان بولاتىن.
ايتا كەتەيىك، بۇعان دەيىن ريم پاپاسىنا سىيعا بەرىلگەن Harley-Davidson موتوسيكلى دە اۋكسيوندا ساتىلعان.
اۆتور: نۇرلان تۇياقوۆ