جاۋابى تابىلماعان 4 سۇراق
ايتاتىن سىلتاۋلارى - ءىشىمىز پىستى. دەگەنمەن، الەمدە ورىن الىپ جاتقان تەحنولوگيالىق جاڭعىرۋدى ءوز اڭگىمەڭىزگە قوسىپ كوردىڭىز بە؟ دوستارىڭىز بۇل جونىندە نە ويلايدى؟ جۇرگىزۋشىسىز كولىكتەر، جاساندى زياتكەر، گەندەردى وندەۋ - بارلىعى جاۋابى ءالى بەلگىسىز سۇراقتار تۋدىرادى. تومەندە كورسەتىلگەن مىنا سۇراقتارعا ءسىز قالاي جاۋاپ بەرەر ەدىڭىز؟ كەيىن دوستارىڭىزدىڭ ويىن ءبىلۋدى دە ۇمىتپاڭىز.
1. ەگەر ميداعى اقپاراتتى كومپيۋتەرگە جۇكتەۋگە مۇمكىندىك بولسا، ءسىز بۇل قادامعا بارار ما ەدىڭىز؟ ەلەستەتىپ كورىڭىزشى، بولاشاقتا ميداعى بار اقپاراتتى كومپيۋتەرگە جۇكتەپ، ءسىزدىڭ ساناڭىزدىڭ ساندىق كوشىرمەسىن جاساۋعا بولادى. تەك جاڭا نۇسقاسى سىزدەن گورى اقىلدىراق. كەيىن ونىڭ بويىندا ءسىز باستان كەشپەگەن سەزىمدەر وزدىگىنەن تۋا باستايدى. ءسىز بۇل قادامعا بارار ما ەدىڭىز؟ نەگە؟ كوشىرمە نۇسقا جاساعان ورىنسىز ارەكەتتىڭ جاۋاپكەرشىلىگىن موينىڭىزعا الاسىز با؟
2. اتا- انادا ءوز بالاسىنىڭ گەنىن وڭدەۋ مۇمكىندىگى بولۋى ءتيىس پە؟ ەگەر، دارىگەرلەر بالاڭىزدا تۋا ءبىتتى جۇرەك جەتىسپەۋشىلىگىن اڭعارىپ، سىزگە بەلگىلى ءبىر گەندى الىپ تاستاۋ ارقىلى الدىن الۋعا بولادى دەسە كونەر مە ەدىڭىز؟ اتا- انالاردىڭ كوپشىلىگى ءسوزسىز كەلىسەرى انىق. ال، بالانى اقىلدى ەتە تۇسۋگە بولادى دەسە شە؟ كەلبەتىنە قاتىستى گەندى وزگەرتەر مە ەدىڭىز؟ بالانىڭ جىنىستىق باعىتىن نەمەسە تەرىسىنىڭ ءتۇسىن تانداۋعا اتا- انانىڭ قۇقىعى بار ما؟
3. جۇرگىزۋشىسىز اۆتوكولىك بەس جاياۋ جۇرگىنشىنى قۇتقارۋ ءۇشىن، جولاۋشىنى ولىمگە قيۋ كەرەك پە؟ ويلانىپ كورىڭىز: ءسىز جۇرگىزۋشىسىز، وزدىگىنەن باسقارىلاتىن كولىكپەن كەلە جاتىرسىز، كەنەت كىشكەنتاي بەس بالا جولعا جۇگىرىپ شىعا كەلدى. كولىكتىڭ ءۇش شەشىم قابىلداۋعا مۇمكىندىگى بار: بالالاردى قاعۋ، قارسى كەلە جاتقان كولىككە سوعىلۋ، جول جيەگىندەگى اعاشقا بۇرىلۋ. ءبىرىنشى جاعدايدا 5 ادام، ەكىنشى جاعدايدا 2 ادام، ءۇشىنشى جاعدايدا 1 ادام قازا تابادى.
مۇنداي جاعدايلار ءۇشىن كولىكتى قالاي باعدارلامالاۋ كەرەك؟ ول جولاۋشىنىڭ ءومىرىن ساقتاۋ كەرەك پە الدە نەعۇرلىم كوپ ادامنىڭ ءومىرىن امان الىپ قالۋى ءتيىس پە؟ قيىن جاعدايدا ءسىزدى ولىمگە قيتياتىن اۆتوكولىككە وتىرۋعا دايىنسىز با؟ بارلىق باسقارۋسىز جۇمىس ىستەيتىن كولىكتەردىڭ قىزمەتى بىردەي بولۋى ءتيىس پە الدە تەك جولاۋشىعا جاۋاپتى كولىك قىمبات تۇرا ما؟
4. روبوتتارعا قانداي ادامي قاسيەتتەر كەرەك؟ اقىلدى روبوتتار - كولىكتەر ادامنان الدەقايدا ءونىمدى جۇمىس ىستەيدى. ولار شارشاۋدى، جالىعۋدى نەمەسە كۇيزەلىستى بىلمەيدى. سونىمەن قاتار، ولار جاقسىلىقتان جاماندىقتى، ادىلەتسىزدىكتەن ادىلەتتىلىكتى ايىرا المايدى. بۇل ۇلكەن داۋعا الىپ كەلۋى مۇمكىن. دەگەنمەن، ولاردىڭ بويىنا، ادامي قاسيەتتەردىڭ ۇلگىسىن قۇيۋ ودان دا قيىنىراق. ويتكەنى، ونى تاڭدايتىن ءبىز - ادامدار. قاي قاسيەت ماڭىزدى دەپ ەسەپتەيسىز؟ "ەڭ دۇرىس" شەشىمدى كىم قابىلداۋى ءتيىس؟ ءاربىر ەل ادامي قۇندىلىقتار جيىنتىعىن ۇسىنۋى ءتيىس پە؟ ال، روبوتقا تاڭداۋ قۇقىعىن بەرۋ دۇرىس پا؟ سۇراقتار وتە قىزىق. كەيدە كۇندەلىكتى تىرلىكتەن جالىققان كەزدە دوستارىڭىزعا بۇل سۇراقتاردىڭ ءبىرىن قويساڭىز، ويلاۋ كوكجيەگىن ارتا تۇسەتىنى انىق. ساتتىلىك تىلەيمىز!