تۇركيادا جەر سىلكىنىسىنەن 49 كۇن وتكەندە حان اتتى مىسىق امان تابىلدى
6- اقپاندا جەر سىلكىنىسى بولعان كەزدە تۋريزم بيزنەسىمەن اينالىساتىن 36 جاستاعى نيدا دينا قىزى نيل بەريل تاشگەتيرەنمەن جانە بريتاندىق 2 جاسار حان اتتى مىسىعىمەن بىرگە ۇيدە ەدى.
ولار 12- اقپان اۋدانىنداعى رەيحان كەنت، 1 مەكەنجايىندا كوپپاتەرلى ۇيدە تۇراتىن.
دينا العاشقى جەر سىلكىنىسى بولعان كەزدە قىزىمەن بىرگە ۇيدەن شىعىپ كەتكەن، ءبىراق مىسىق سول كۇيى پاتەردە قالىپ قويعان، سىرتقا شىقپاعان.
سول كۇنگى ەكىنشى جەر سىلكىنىسىنەن كەيىن 11 قاباتتى ءۇي قيراپ، تۇگەل قۇلادى. قيراندىلاردىڭ اراسىندا قالعان مىسىقتى تابۋ مۇمكىن بولمادى.
نيدا دينا ءۇيىندىنىڭ قاسىنان كەتپەي 40 كۇنگە جۋىق كولىكتە وتىرىپ، مىسىعىن كۇتتى. مىسىعىنىڭ سۋرەتىن ادامدارعا كورسەتىپ، كورگەن-كورمەگەنىن سۇراپ شىققانىن ايتادى، الايدا كوپ ادام ونى تۇسىنبەگەن.
ارادا 49 كۇن وتكەندە حان ءتىرى تابىلعاندا ول ءوز كوزىنە سەنە الماي، قاتتى قۋاندى.
مىسىق جۇرە المايدى، اياعى سىنعان. ول قازىر ەمدەلىپ جاتىر.
«مىسىعىمدى تاپتىم. بۇل ءبىز ءۇشىن ءبىر تاڭعاجايىپ وقيعا. سوڭعى ساتكە دەيىن ءۇمىتىمدى ۇزگەن ەمەسپىن. ول ۇنەمى مەنىڭ جانىمدا ۇيىقتايتىن. قيراندىلاردى ارشىپ جاتقان ەكسكاۆاتور جۇرگىزۋشىسى جانە عيمارات يەسى ونى اس ۇيدەگى كىلەمنىڭ ۇستىنەن تاۋىپتى. كەيىن ونى ۆەتەرينارعا اپاردىق. جاعدايى ناشار، دارىگەرلەر ىشكى مۇشەلەرىن دە قاراپ، ەمدەپ جاتىر. ەشقانداي قيىندىقسىز دەنساۋلىعىن قالپىنا كەلتىرەدى دەپ سەنەمىن»، - دەيدى مىسىقتىڭ يەسى.
ۆەتەرينار فاتماگۇل حانجىوعلى 2 جىل بويى مىسىقتىڭ دەنساۋلىعىن ءوزى قاراپ، ەكپە سالىپ كەلگەن ەكەن.
«49 كۇننەن كەيىن امان تابىلعانىنا وتە قۋانىشتىمىز. اعزاسى سۋسىزدانعان، كوپ سۇيىقتىق بەرىپ جاتىرمىز. ەمىن ءارى قاراي جالعاستىرامىز. امان قالادى دەپ ۇمىتتەنەمىن»، - دەيدى ۆەتەرينار.
عيمارات يەسى فاحري حاتيپوعلىنىڭ ايتۋىنشا، اسۇيدەگى ىدىستاردى امان الىپ قالۋعا تىرىسىپ، ءۇيىندى استىن قازىپ جاتقاندا مىسىقتى بايقاپ قالعان.
ول مىسىقتى قۇتقارعان ساتتەردى ۇيالى تەلەفونىنىڭ كامەراسىنا ءتۇسىرىپ العانىن ايتادى.