سەمەي تۇرعىنى رەسەيدە 48 جولاۋشىنى ورتتەن قالاي قۇتقارعانىن ايتىپ بەردى
37 جاستاعى ەرجان كولىك ساتىپ الۋ ءۇشىن تامىزدىڭ 4- كۇنى كەشكى ساعات 19.50-دە «سەمەي - نوۆوءسىبىر» باعىتىنداعى اۆتوبۋسپەن جولعا شىققان. ءبىراق تۇنگى ساعات 3.20-دا الەيسك قالاسىنا جاقىنداعاندا اۆتوبۋستان ءورت شىققان. بۇل ۋاقىتتا جولاۋشىلاردىڭ بارلىعى تىنىش ۇيقىدا جاتقان. ءورت تۇتانعانىن تەك ەرجان عانا بايقاعان. ول بىردەن جۇرگىزۋشىگە اۆتوبۋستا ءورت شىققانىن حابارلاپ، كولىكتى توقتاتۋىن سۇراعان. ءبىراق ول ەرجاننىڭ ايتقان سوزىنە سەنبەگەن. سودان كەيىن جولاۋشى جۇدىرىق جۇمساۋعا ءماجبۇر بولعان.
«مەن ۇيقىعا جاتقانمىن. ارادا شامامەن 1 مينۋت وتكەندە ورىندىعىمنىڭ استى جىپ-جىلى بولىپ كەتتى. كوزىمدى اشىپ قاراسام ورىندىعىمنىڭ استى تۇتىندەپ، جانىپ جاتىر. بىردەن جۇرگىزۋشىگە بارىپ، «ءبىز جانىپ جاتىرمىز» دەدىم. ءبىراق ول مەنىڭ سوزىمە سەنبەدى. ال، ەكىنشى جۇرگىزۋشى ۇيىقتاپ جاتىر. اۆتوبۋستى توقتاتپاعان سوڭ، وعان قول كوتەرۋگە تۋرا كەلدى. سودان كەيىن عانا ول توقتادى. ال قايتا جۇگىرىپ ورنىما كەلسەم، قىزىل جالىن ءبىرشاما جەردى شارپىعان. «جانىپ جاتىرمىز» دەپ ايعايلاسام دا، ادامدار سەزبەيدى. سويتسەم اۆتوبۋستىڭ ارتقى بولىگىندە وتىرعانداردىڭ كوبى كوك تۇتىنگە ۋلانىپ ۇلگەرگەن ەكەن. ال كەيبىرى نە بولعانىن تۇسىنبەي، قاراپ وتىر. ءتىپتى جۇرگىزۋشى اۆتوبۋستىڭ ەسىگىن دە اشپادى. سودان كەيىن ەكى ەسىكتى تەپكىلەپ، يتەرىپ جارتىلاي اشتىم. الدىمەن بالالاردى دالاعا شىعاردىم. كوتەرىپ الىپ، بىرىنەن كەيىن ءبىرىن لاقتىرا بەردىم. ويتكەنى ءورت كۇشەيىپ بارادى. ال جۇرگىزۋشى ءورت ءسوندىرۋ قۇرالىمەن ءورتتى ءسوندىرىپ جاتتى. ءبىراق قىزىل جالىن دەس بەرمەدى»، - دەيدى ەرجان.
جولاۋشىلار ىشىندە 3 ايلىق بالادان زەينەتكەرگە دەيىن بار. بارلىعى - 48 جولاۋشى. ونىڭ 12 سى - بالا. ەرجاننىڭ سوزىنشە، اۆتوبۋس نەبارى 4 مينۋتتىڭ ىشىندە ورتكە ورانعان. ال ول جولاۋشىلاردى 1 مينۋت 45 سەكۋندتا قۇتقارعانىن ايتادى. رەسەيگە كولىك ساتىپ الۋ ءۇشىن بارا جاتقان ول 1,4 ميلليون تەڭگە الىپ شىققان. ءبىراق ول جولاۋشىلاردى قۇتقارىپ الۋ ءۇشىن جانتالاسىپ جۇرگەندە قۇجاتتارى مەن اقشاسى جانىپ كەتكەن.
وقيعا ورنىنا شامامەن 10 مينۋت ىشىندە ءورت سوندىرۋشىلەر جەتىپ، قىزىل جالىندى اۋىزدىقتاعان. بارلىق جولاۋشى باسقا اۆتوبۋسقا وتىرعىزىلىپ، بارناۋل قالاسىنا جەتكەن. ال ەرجاندى ءمان-جايدى بىلگەن سوڭ تاكسي جۇرگىزۋشىسى نوۆوسىبىرگە تەگىن جەتكىزگەن. ال ول جاقتا 3 كۇن ىشىندە بارلىق جانىپ كەتكەن قۇجاتتارى قايتا راسىمدەلگەن.
«مەنى الەۋمەتتىك جەلى ارقىلى سونداعى تەلەارنالاردىڭ بىرىندە ىستەيتىن جۋرناليست قىز تاۋىپ الدى. مەن تۋرالى اقپاراتتى بىردەن تەلەديداردان كورسەتتى. كەيىن مەنى پوليتسياعا اپارىپ، قۇجاتتارىمدى راسىمدەۋگە كومەكتەسىپ، تاماقتاندىرىپ، جاتىن ورىن بەردى. ال جەرگىلىكتى بيلىك تاراپىنان ەشقانداي قولداۋ بولمادى. ءتىپتى بىرەۋى كەلىپ راحمەت ايتپادى»، - دەيدى ول.
اۆتوبۋس سەمەيدەگى «سۇلۋ» اۆتوبەكەتىنەن شىققان. كەيىن ەرجان اۆتوبەكەتتىڭ باسشىلىعىنا حابارلاسىپ، ادامداردىڭ ومىرىنە نەمقۇرايلى قاراۋعا بولمايتىنىن ايتقان. ءبىراق اۆتوبەكەتتەگىلەر اۆتوبۋستىڭ رەسەي ەلىنە تيەسىلى ەكەنىن، بارلىق ارىز-شاعىمدى سولارعا ايتۋ كەرەك ەكەنىن جەتكىزگەن.
«اۆتوبۋس سەمەيگە كەلگەن سوڭ تەحنيكالىق تەكسەرۋ جۇرگىزىلۋى كەرەك. مەن وسىنى ايتقاندا اۆتوبەكەت باسشىسى تەلەفوندى قويا سالدى. سودان بەرى جاۋاپتان قاشىپ ءجۇر. كەيىن ماعان ماسكەۋلىك زاڭگەر اۆتوبۋس جولعا شىقپاس بۇرىن قازاقستاندا تەكسەرىلۋى كەرەك ەكەنىن ايتتى. بىرنەشە كۇن وتكەن سوڭ جانىپ كەتكەن اقشامدى ءوندىرىپ الۋ ءۇشىن اۆتوبۋس يەسىن ىزدەدىم. ونى دوستارىمنىڭ كومەگىمەن تاپتىم. ولار ماسكەۋدەن گرەك-ريم كۇرەسىنەن وتكەن جارىستان كەلە جاتقان بولاتىن. بارلىعى عالامتور ارقىلى ەستىگەن ەكەن»، - دەپ ءسوزىن جالعاستىردى ەرجان.
ەرجانعا جانىپ كەتكەن اقشاسىن اۆتوبۋس جۇرگىزۋشىسى 15 -تامىزعا دەيىن قايتارامىن دەپ، قولحات جازىپ بەرگەن. ءبىراق تەك 150 مىڭ رۋبلىن قايتارادى.
«ەگەر اۆتوبۋس جاڭا بولعاندا، مۇنداي جاعداي ورىن الماس ەدى. سوندىقتان ەسكى اۆتوبۋستاردى الىپ تاستاۋ كەرەك. ەگەر ءورتتى مەن بايقاماعاندا بارلىعىمىز تىرىدەي جانىپ كەتەر ەدىك. مەن بۇل جاساعان ارەكەتىممەن ماقتانبايمىن. ءبىراق مەن حالىق ءۇشىن الاڭدايمىن. ەگەر ەسكى اۆتوبۋستار باعىتتان شىعارىلماسا، تالاي ادامنىڭ ولىمىنە اكەلۋى مۇمكىن. سوندىقتان مەنىڭ وسى ءسوزىمدى جوعارىدا وتىرعاندار ەسكەرسە ەكەن»، - دەيدى ەرجان.
ەرجان نەگىزى كاسىپكەرلىكپەن اينالىسادى. 4 بالانىڭ اكەسى. ۇلكەنى - 16، كىشكەنتايى - 3 جاستا. گرەك-ريم كۇرەسىنەن جاتتىقتىرۋشى بولىپ رەسمي تۇردە جۇمىس ىستەمەيدى. تەك ءوزىنىڭ جاتتىقتىرىپ، جارىستارعا اپاراتىن تاربيەلەنۋشىلەرى بار. ورىن العان جاعدايدان كەيىن وسكەمەن مەن سەمەيدىڭ دەنە شىنىقتىرۋ جانە سپورت باسقارماسى تاراپىنان رەسمي جاتتىقتىرۋشى رەتىندە جۇمىسقا تۇرۋعا ۇسىنىس تۇسكەن ەكەن.
ەرجان قازاقستانعا دوستارىنىڭ كومەگىمەن جەتكەن. وتباسى مەن تۋعان-تۋىسقاندارى دا بولعان وقيعانى الەۋمەتتىك جەلى ارقىلى بىلگەن. اقشاسىز قالعان ول 5 كۇن بويى ۇيدەگىلەرىمەن حابارلاسا الماعان. تەك بۇگىن سەمەيگە كەلگەن سوڭ كورىسىپ وتىر.