قىلمىستىق كودەكستىڭ ءىس جۇزىندە قولدانىلمايتىن 485 بابىنا تالداۋ جاسالدى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە ادىلەت ۆيتسە-ءمينيسترى الما مۇقانوۆا ايتتى، دەپ حابارلايدى قازاقپارات ءتىلشىسى.
«وتكەن جىلى مەملەكەت باسشىسى قازاقستان حالقىنا جولداۋىندا قىلمىستىق جانە قىلمىستىق-پروتسەستىك كودەكستەرگە ريەۆيزيا جۇرگىزىپ، ءىس جۇزىندە جۇمىس ىستەمەيتىن نەمەسە سوت تورەلىگىنە كەدەرگى كەلتىرەتىن بارلىق نورمالاردان ارىلۋ كەرەكتىگىن، سونداي-اق قىلمىستىق جانە قىلمىستىق-پروتسەستىك زاڭنامانىڭ تۇراقتىلىعىن قامتاماسىز ەتۋدىڭ ماڭىزدىلىعىن اتاپ ءوتتى. سوندىقتان ادىلەت مينيسترلىگىنە وسى كودەكستەردى تۇزەتۋ جونىندەگى وكىلەتتىك بەرىلدى. ءوز كەزەگىندە ادىلەت مينيسترلىگىنىڭ جانىنان قىلمىستىق جانە قىلمىستىق-پروتسەستىك زاڭنامانى جەتىلدىرۋ ماسەلەسى بويىنشا جوبالىق كەڭسە جانە ۆەدومستۆوارالىق جۇمىس توبى قۇرىلدى»، - دەدى الما مۇقانوۆا.
ونىڭ ايتۋىنشا، جوبالىق كەڭسەنىڭ قۇرامىنا قۇقىق قورعاۋ جانە ارناۋلى مەملەكەتتىك ورگانداردىڭ، سوت، عىلىمي جانە ادۆوكاتتىق قوعامداستىقتىڭ وكىلدەرى ەنگەن.
«بىلتىر قازان ايىنان جەلتوقسان ايىنىڭ سوڭىنا دەيىن جوبالىق كەڭسە وسى كودەكستەردىڭ قولدانىلۋ پراكتيكاسى مەن ستاتيستيكالىق دەرەكتەردى ەسكەرە وتىرىپ، جۇمىس ىستەمەيتىن نورمالاردى، كولليزيالاردى، ولقىلىقتار مەن سوت تورەلىگىنە كەدەرگى كەلتىرەتىن نورمالاردى انىقتاۋ ءۇشىن جالپى سانى 1151 باپقا تالداۋ جۇرگىزدى. ونىڭ ىشىندە قىلمىستىق كودەكستىڭ – 485، قىلمىستىق-پروتسەستىك كودەكستىڭ 666 بابىنا تالداۋ جاسالدى»، - دەپ توقتالدى الما مۇقانوۆا.