ەلوردادا 480 كۇن ەس- ءتۇسسىز جاتقان بالاعا وپەراتسيا جاسالدى
وسىعان دەيىن كارىم تاڭىربەرگەننىڭ اناسى بالاسىن مانۋالدى ماسساجعا اپارىپتى. سالدارىنان ءبۇلدىرشىننىڭ ومىرتقاسى سىنىپ، دەمالا الماي قالعان. ول پاۆلودارداعى وبلىستىق بالالار اۋرۋحاناسىنىڭ جانساقتاۋ بولىمىندە 480 كۇن ەس- ءتۇسسىز جاتقان. كەيىن وبلىستىق دەنساۋلىق ساقتاۋ باسقارماسى كارىمدى سانيتارلىق اۆياتسيانىڭ كومەگىمەن 30 - ءساۋىر كۇنى استاناداعى ۇلتتىق نەيروحيرۋرگيا ورتالىعىنا جەتكىزدى. بۇگىن بۇل ورتالىقتىڭ نەيروحيرۋرگتارى 2 جاسار بۇلدىرشىنگە كۇردەلى وپەراتسيا جاسادى.
جۇلىن نەيروحيرۋرگياسى بولىمشەسىنىڭ مەڭگەرۋشىسى تالعات كەرىمبايەۆ وپەراتسيانىڭ ءساتتى وتكەنىن ايتتى. «مۇنداي وپەراتسيا الەمدە العاش رەت جاسالدى. بۇعان دەيىن 2 جاسار بالاعا ءدال وسىنداي وپەراتسيا جاسالماعان. ستاندارتتى وپەراتسيادا بالانىڭ قاراقۇسى مەن مويىن ومىرتقاسىنا ۇلكەن تىلىمشە بەكىتىلەدى. ال ول الداعى ۋاقىتتا بالانىڭ ەركىن قوزعالۋىنا كەدەرگى جاسايتىن بولادى»، - دەدى دارىگەر.
ونىڭ ايتۋىنشا، بۇل جولى وتاندىق ماماندار باسقا تەحنولوگيانى پايدالانعان. «ءبىز ءبۇلدىرشىننىڭ مويىن ومىرتقاسىنا ارنايى بەكىتكىشتەردى قويدىق. ول قۇرال تيتاننان جاسالادى. قاراپايىم تىلمەن ايتاتىن بولسام، بۇل قۇرالدى بالا باسىن ۇستاۋى ءۇشىن بۋىنعا بەكىتتىك. وسىلايشا، بالانىڭ زاقىمدانعان مويىن ومىرتقاسىنىڭ بولىگى قالپىنا كەلتىرىلدى. وتا اياقتالعان سوڭ، بالانىڭ مويىن ومىرتقاسىن رەنتگەنگە تۇسىردىك. وپەراتسيانىڭ ءساتتى وتكەنىنە كوزىمىز جەتتى»، - دەدى ول جۋرناليستەرگە.
دارىگەر كۇردەلى وپەراتسيانىڭ ءۇش- ءتورت ساعاتقا سوزىلعانىن ايتتى. وپەراتسيا جاساۋعا قاجەتتى مەديتسينالىق قۇرالدار تاڭعى ساعات 08:00-دە دايىندالا باستاپتى. كۇردەلى وپەراتسيا تۇسكە تامان اياقتالدى.
«پاۆلودارداعى وبلىستىق بالالار اۋرۋحاناسىندا جاتقان كەزدە كارىمنىڭ جاعدايىن ءبىر جىلداي باقىلادىق. ول باسىن ۇستاي المايتىن. مويىن ومىرتقاسى 4 جەردەن سىنىپ، بۋىنى شىققان. سوندىقتان الدىمىزعا 3 ماقسات قويدىق: الدىمەن جۇلىن مەن سوپاقشا ميدى بوساتۋ، ەكىنشىدەن، ونى ورنىنا قويۋ. ۇشىنشىدەن، بەكىتۋ. وسى ماقساتىمىزعا جەتتىك. بالانىڭ دەنساۋلىعى جاقسارىپ كەتەدى دەگەن ۇمىتتەمىز»، - دەدى نەيروحيرۋرگ.
ءبىراق ول بالا قاشان ءجۇرىپ كەتەدى دەگەن سۇراققا ناقتى جاۋاپ بەرە المادى. دارىگەردىڭ ايتۋىنشا، بۇل ۋاقىت ەنشىسىندە.
تالعات كەرىمبايەۆ مۇنداي كۇردەلى وپەراتسيانىڭ بۇرىن- سوڭدى نەگە جاسالماعانىن ءتۇسىندىردى. «مويىن ومىرتقاسى مەن سوپاقشا مي اۋماعىنا وپەراتسيا جاساۋ وتە قيىن. سەبەبى، مۇنداعى تامىرلار ادام ءومىرى ءۇشىن وتە ماڭىزدى. ولار سۇيەك وزەكتەرى ارقىلى ءوتىپ، جۇلىن مەن سوپاقشا ميدىڭ قىزمەتىنە اسەر ەتەدى. مۇندا ومىرتقا ارتەرياسى مەن مويىندىرىق كوك تامىرىن دا اتاپ وتكەن ءجون. ولار سۇيەك وزەكتەرىنە وتە جاقىن ورنالاسقان. ال ەكى جاسار ءسابيدىڭ سۇيەكتەرى كىشكەنتاي ءارى قاتپاعان. سوندىقتان بۇل وپەراتسيانى جاساۋ وتە قيىن»، - دەيدى دارىگەر.
نەيروحيرۋرگ كارىم تاڭىربەرگەن قازىرگى تاڭدا ناركوزدا جاتقانىن جەتكىزدى. ونىڭ ايتۋىنشا، بالا ەرتەڭ ەسىن جيادى. ەندى ونىڭ دەنساۋلىعى دارىگەرلەردىڭ قىراعى باقىلاۋىندا بولادى. ءسابيدىڭ اناسى جۋرناليستەرگە سۇحبات بەرۋدەن باس تارتتى.
www.24.kz