مينيستر بانكتەن كەپىلدىك العان 4800 ادام كولىگىن قانشا ايدا الاتىنىن ايتتى
24 مامىر 13:42

مينيستر بانكتەن كەپىلدىك العان 4800 ادام كولىگىن قانشا ايدا الاتىنىن ايتتى

نۇر-سۇلتان. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ 4 پايىزدىق اۆتونەسيەگە كەپىلدىك العان 4800 ادام 2-3 ايدىڭ ىشىندە كولىگىن الاتىنىنا سەنىمدى، دەپ حابارلايدى قازاقپارات ءتىلشىسى.

«اۆتوسالونعا بارساق كولىك جوق. كۇتىڭىزدەر دەيدى. قانشا دەسەك، ناقتىسىن ايتپايدى. جىلداپ سوزىلىپ كەتۋى مۇمكىن دەگەندى دە ەستىدىك. بۇل پروبلەمانى بىلەسىزدەر مە؟» دەپ سۇرادى مينيستردەن جۋرناليستەر ۇكىمەت وتىرىسىنان كەيىن. ءمينيستردىڭ پايىمىنشا، ءبىر كۇندە 10 مىڭ نەمەسە 20 مىڭ، 50 مىڭ كولىك شىعارۋ مۇمكىن ەمەس.

«2-3-ايدىڭ ىشىندە نەسيە العان ادامدارعا كولىك جەتكىزۋگە زاۋىتتاردىڭ مۇمكىندىگى بار»، - دەدى قايىربەك وسكەنبايەۆ. سونداي-اق، ول ب ا ق وكىلدەرىنىڭ ەلدەگى اۆتوونەركاسىپتىڭ بەتالىسى تۋرالى سۇراعىنا جاۋاپ بەردى.

«سول ءسىز «تۇككە تۇرمايتىن زاۋىت» دەپ تۇرعان زاۋىتتاردى بارىپ كورەيىكشى. بىرگە بارايىق. سىزدەر ول زاۋىتتاردى كورگەن جوقسىزدار. ول جەردە كولىك شىعارىلىپ جاتىر. بۇگىندە 4800 ادام بانكتەردەن كەپىلدىك الىپ ۇلگەردى، ماشينە الۋعا رۇقساتى بار. ەشقانداي 10 جىل كۇتپەيدى. ارى كەتكەندە 2-3-ايدىڭ ىشىندە زاۋىت ولارعا كولىك بەرۋگە مىندەتتى»، - دەدى مينيستر.

بۇعان دەيىن اتالمىش جوباعا جاۋاپتى ورگاندار 4 پايىزدىق اۆتونەسيە الۋدىڭ نۇسقاۋلىعىن جاريالاعان بولاتىن.

جاڭالىقتار