اقتوبەدە بيىل 47 ادام سۋيتسيدتەن كوز جۇمدى
اقتوبە وبلىستىق پروكۋراتۋراسىنىڭ مالىمەتىنشە، سۋيتسيد جاسايتىندار سانى ارتقان. بىلتىر ءدال وسى ۋاقىتتا 128 دەرەك تىركەلسە، بيىل 168 گە جەتكەن. ورتا ەسەپپەن كۇنىنە 2 ادام سۋيتسيد جاسايدى.
«اقتوبە قالاسىندا 143، مۇعالجاردا 5، شالقاردا 4، مارتوكتە 3، ايتەكە بي اۋدانىندا 3 جاعداي تىركەلدى. كوپقاباتتى ۇيلەردەن سەكىرۋ كەزىندە قوعامدا ەرەكشە رەزونانس تۋىندايدى. بيىل وسىنداي 5 جاعداي تىركەلدى. ءساۋىر ايىندى ءۇش ايەل كوپقاباتتى ۇيدەن سەكىردى. ونىڭ بىرەۋى 25 قاباتتى «اقتوبە-اجارى» تۇرعىن ءۇي كەشەنىندە بولسا، ەكىنشىسى اقتوبە قالاسىنىڭ ورتالىعىنداعى توعىز قاباتتى ۇيدە انىقتالدى. قازىر وبلىس پروكۋراتۋراسى جەرگىلىكتى اتقارۋشى ورگاننىڭ اتىنا سۋيتسيدتىڭ الدىن الۋ جونىندە شارالار قابىلداۋ تۋرالى حات جولدادى»، - دەپ حابارلادى اقتوبە وبلىستىق پروكۋراتۋرا باسقارماسىنىڭ پروكۋرورى اسحات ماكايەۆ.
پروكۋروردىڭ ايتۋىنشا، سۋيتسيد ءجيى جاسالاتىن ورىندارعا مونيتورينگ جۇرگىزىپ، ولاردى بولدىرماۋ ءۇشىن شارالار قابىلدانۋى ءتيىس. ماسەلەن، 25 قاباتتى تۇرعىن ءۇي كەشەنىندەگى بالكوننىڭ اشىق ۋچاسكەلەرىنە قورشاۋلار ورناتۋ مىندەت.
«شاتىرعا شىعاتىن ەسىكتەردى قۇلىپتاۋ مىندەتى كوندومينيۋم ءتوراعالارى جانە مۇلىك يەلەرىنىڭ بىرلىستىگى باسقارۋشىلارىنا جۇكتەلۋى ءتيىس. سونىمەن بىرگە سۋيتسيدتىڭ الدىن الۋ جونىندەگى ۆەدومستۆوارالىق توپ قۇرىپ، ءاربىر فاكتىنى زەرتتەگەن دۇرىس. قايعىلى وقيعانى بولدىرماۋ ءۇشىن ارنايى تەتىكتەردى ازىرلەي وتىرىپ، سەبەپتەردى ايقىنداۋ، ونىڭ ىشىندە حالىقارالىق تاجىريبەنى زەردەلەۋ جانە ونى ەنگىزۋ تۋرالى حات جولداندى. بۇل ماسەلە وبلىس پروكۋراتۋراسىنىڭ ەرەكشە نازارىندا»، - دەدى پروكۋرور اسحات ماكايەۆ.
ەسكە سالساق، بيىل ساۋىردە اناسى مەن قىزى 25 قاباتتى ءۇيدىڭ تەرەزەسىنەن سەكىرىپ مەرت بولدى. پوليتسيا قىلمىستىق ءىس قوزعاعانىمەن، وقيعانىڭ سەبەبى بەلگىسىز كۇيىندە قالدى.
اۆتور:
التىناي ساعىندىقوۆا