ەلىمىزدىڭ حالىقارالىق قورىنداعى التىن ۇلەسى 47 پايىزعا جۋىقتادى
«وتكەن جىلدىڭ قورىتىندىسىندا ەلدىڭ جالپى حالىقارالىق قورى 31 ميلليارد دوللاردى قۇرادى. بۇل 2017 -جىلمەن سالىستىرعاندا 15,1 پايىزعا كوپ. ونىڭ 46,5 پايىزىن (14,4 ميلليارد دوللار) التىن قۇرايدى. سالىستىرمالى تۇردە ايتار بولساق، وسىدان ءبىر جىل بۇرىن التىن ۇلەسى نەبارى 40,3 پايىزدى قۇراپ، ال بەس جىل بۇرىن 77,5 پايىز ەركىن كونۆەرتاتسيالاناتىن شەتەل ۆاليۋتاسى بولدى»، - دەلىنگەن جاريالانعان اقپاراتتا.
مەملەكەت ەلىمىزدىڭ التىن- ۆاليۋتا قورىن تازارتىلعان التىن قۇيمالارىمەن تولتىرا وتىرىپ، قازاقستاندا شىعارىلاتىن بارلىق التىندى ساتىپ الۋدا.
ايتا كەتەرلىگى، رەسپۋبليكادا وندىرىلەتىن التىننىڭ ءبىر كولىگى حالىققا دا ساتىلىپ جاتىر. ماسەلەن، وسى ۋاقىتقا دەيىن ەكىنشى دەڭگەيلى بانكتەر ارقىلى جالپى سالماعى 166,9 كەلى بولاتىن 4 مىڭنان استام شاعىن التىن قۇيمالارى ساتىلدى. وتكەن جىلعى قاراشا ايىنىڭ سوڭىنان بەرى ۆاليۋتا ايىرباستاۋ ورىندارىنىڭ دا شاعىن التىن قۇيمالارىن ساتۋعا مۇمكىنشىلىگى بار. سول ۋاقىتتا ۇلتتىق بانك سالماعى 12-13 كەلى بولاتىن التىن قۇيمالاردى ساتىلىمعا شىعاراتىندىعى بەلگىلى بولعان ەدى. ونى جەكە جانە زاڭدى تۇلعالار ساتىپ الا الادى.
التىن قۇيمالارىن الەمدىك نارىقتا دا ساتۋعا جول اشىلىپ وتىر. ۇلتتىق بانك اعىمداعى جىلدان باستاپ باعالى مەتالدى كوممەرتسيالىق ساۋدا سەرىكتەستەرىنە ساتۋعا دايىن. دەگەنمەن، ونىڭ كولەمى شەكتەۋلى، 5 توننادان اسپايدى.
دۇنيەجۇزىلىك التىن كەڭەسىنىڭ دەرەكتەرىنە سايكەس، قازاقستاننىڭ التىن قورى 341,2 توننانى (الەمدە 15-ورىندا) قۇرايدى. بۇل 2017 -جىلدىڭ سوڭىنداعى كولەمنەن شامامەن 50 تونناعا، ال 2016 -جىلعى كولەمنەن 83 تونناعا كوپ.