سەمەيدە 47 مايدانگەر تۇرادى، سولاردىڭ ءبىرى - 96 جاستاعى بەيسەمباي قويشىبەكوۆ
بەيسەمباي اتا 1923-جىلى 11- قاراشادا جارما اۋدانى، مالايقاراسۋ اۋىلىندا دۇنيەگە كەلگەن. نەبارى 2 جاسىندا اتا-اناسىنان ايىرىلىپ، جاستايىنان جەتىم قالعان بالا كەيىن بالالار ۇيىندە تاربيەلەنەدى. 2- سىنىپتى بىتىرگەن سوڭ ۇزاق جىلدار مال باعۋمەن اينالىسادى. ال 1942-جىلى سوعىس باستالعان ۋاقىتتا مال باعىپ جۇرگەن جەرىنەن مايدان الاڭىنا اتتانعان.
«لەنينگراد، ستالينگراد، بەلارۋس فرونتى مەن ۋكراينا فرونتىندا بولدىم. 1945-جىلى جەڭىستى گەرمانيادا قارسى الدىق. سوعىستا ەكى رەت جارالاندىم. سوعىس اياقتالعان سوڭ بىردەن ەلگە ورالمادىم. الدىمەن ۇلكەندەردى ەلگە قايتاردى، جاستاردى 2 جىلعا الىپ قالدى. مەن سول ۋاقىتتا ماسكەۋدە 1947-جىلعا دەيىن اسكەري بورىشىمدى وتەدىم»، - دەپ اڭگىمەسىن جالعاستىردى اقساقال.
سوعىس اياقتالىپ، اسكەري بورىشىن وتەپ، ەلگە ورالعان سوڭ بەيسەمباي اقساقال ءبىراز ۋاقىت تەرىستاڭبالى، ۆلاديميروۆكا، بەسباي اۋىلدارىندا مال باعۋمەن اينالىسادى. سول كەزدە ازامات 2- سىنىپتىق ءبىلىمى عانا بولسا دا 7 سىنىپتىڭ اتتەستاتىن الادى. 1948-جىلدان باستاپ پوشتا باسشىسى بولىپ جۇمىس ىستەيدى. ال 1960 - 1983-جىلدار ارالىعىندا رابكوپتىڭ باسشىسى قىزمەتىن اتقارادى. 22 جىل وسى قىزمەتتە ابىرويلى جۇمىس ىستەپ 1983-جىلى زەيتنەتكە شىعادى.
«ول كەزدە زامان قيىن ەدى. جەتىمدىكتى، اشارشىلىقتى، جوقشىلىقتى دا كوردىم. سوعىستىڭ بىتكەنىنە دە قانشا جىل ءوتتى، جاسىم دا كەلدى كوپ نارسە ەسىمدە جوق. باستىسى بۇگىنگى كۇنى بەيبىت زاماندا ءومىر ءسۇرىپ جاتىرمىز»، - دەپ ءسوزىن اياقتادى اقساقال.