اسقار مامين: 47 مىڭ جوباعا 2,5 تريلليون تەڭگە جەڭىلدەتىلگەن نەسيە بەرىلەدى

نۇر- سۇلتان. قازاقپارات - بيزنەستىڭ قارقىندى دامۋىنا بارىنشا قولايلى جاعداي جاساۋ ءۇشىن اۋقىمدى كونسترۋكتيۆتى جۇمىس جۇرگىزىلۋدە.

ۇكىمەت وتىرىسىندا پرەمەر- مينيستر اسقار مامين سالادا اتقارىلىپ جاتقان شارۋالارعا وسىنداي باعا بەردى، دەپ حابارلايدى قازاقپارات ءتىلشىسى.

«بيزنەستىڭ قارقىندى دامۋىنا بارىنشا قولايلى جاعداي جاساۋ ءۇشىن اۋقىمدى كونسترۋكتيۆتى جۇمىس جۇرگىزىلۋدە. سونىمەن قاتار پاندەميا ءوز تۇزەتۋلەرىن ەنگىزدى، شەكتەۋلەردەن شاعىن جانە ورتا بيزنەس زارداپ شەكتى. جۇرگىزىلگەن جۇمىس ناتيجەسىندە ەكونوميكالىق ءوسۋدى قالپىنا كەلتىرۋ جونىندەگى 2021 -جىلعا ارنالعان كەشەندى جوسپار جاڭارتىلدى، وندا شاعىن جانە ورتا بيزنەس سۋبەكتىلەرىن قولداۋدىڭ قوسىمشا 60 شاراسى كوزدەلگەن»، - دەدى پرەمەر- مينيستر.

ول، سونداي- اق، سالىقتىق جەڭىلدىكتەر ارقىلى بيزنەستىڭ جۇكتەمەسىن ازايتۋ، سالىقتىق اكىمشىلەندىرۋدى جەڭىلدەتۋ، جەڭىلدەتىلگەن قارجىلاندىرۋعا قولجەتىمدىلىكتى كەڭەيتۋ، مەملەكەتتىك ساتىپ الۋعا قولجەتىمدىلىكتى جەڭىلدەتۋ، كاسىپكەرلىك قىزمەتتى رەتتەۋدى ازايتۋ شارالارىنىڭ جۇيەلى جۇرگىزىلگەنىن اتادى.

«بيىل شاعىن جانە ورتا بيزنەستىڭ قارجىلاندىرۋعا قولجەتىمدىلىگىن كەڭەيتۋ شەڭبەرىندە 47 مىڭعا جۋىق جوبانى قامتي وتىرىپ، 2,5 تريلليون تەڭگەدەن استام جەڭىلدىكپەن كرەديت بەرۋ ۇسىنىلدى. كاسىپكەرلىكتى قولداۋ باعدارلامالارى بويىنشا بيزنەستىڭ وتىنىمدەرىن قاراۋ مەرزىمدەرىن 21 كۇننەن 5 جۇمىس كۇنىنە دەيىن قىسقارتۋ جۇمىسى جۇرگىزىلدى. كرەديتتەردى سۋبسيديالاۋ جانە ولارعا كەپىلدىك بەرۋ شەڭبەرىندە مەملەكەتتىك كورسەتىلەتىن قىزمەتتەردى تسيفرلاندىرۋ بيىل %97 دەيىن ۇلعايدى»، - دەدى اسقار مامين.

پرەمەر- مينيستر 2021 -جىلعى 1 -ءساۋىر – 1-ماۋسىم ارالىعىندا شاعىن جانە ورتا بيزنەس سۋبەكتىلەرى ءۇشىن ەڭبەكاقى تولەۋ قورىنان ۇستالاتىن سالىقتاردىڭ بارلىق ءتۇرىن تولەۋ مەرزىمى كەيىنگە شەگەرىلگەنىن ەسكە سالدى. بۇل بيزنەسكە شامامەن 200 ميلليارد تەڭگەنى ساقتاۋعا مۇمكىندىك بەرگەن كورىنەدى.