شىعىس قازاقستاندا بيىل 46 اۋىلدىڭ باس جوسپارى جاسالادى

وسكەمەن. قازاقپارات - شىعىس قازاقستان وبلىسىندا بيىل 46 اۋىلدىڭ باس جوسپارى ازىرلەنبەك. بۇل تۋرالى ءوڭىر اكىمدىگىندە وتكەن جينالىس بارىسىندا ايتىلدى، دەپ حابارلايدى قازاقپارات ءتىلشىسى.

«شىعىس قازاقستان وبلىسىندا بارلىعى التى قالا، 357 اۋىل بار. بيىل 46 ەلدى مەكەننىڭ باس جوسپارى ازىرلەنەدى. بۇدان بولەك، شەمونايحا، سەرەبريانسك جانە التاي قالالارى ءۇشىن باس جوسپار ازىرلەۋ باسىمدىققا يە. ارنايى جول كارتاسى جانە ودان ارى قاراي ارەكەت ەتۋ الگوريتمى جاسالدى»، - دەدى ايماق باسشىسى دانيال احمەتوۆ.

ونىڭ ايتۋىنشا، وسكەمەندە قۇرىلىس تىعىزدىلىعى تەكسەرىلۋى قاجەت. سەبەبى ۇيلەردىڭ اراسى تىم جاقىن ورنالاسسا حالىققا قولايسىزدىق تۋدىرادى.

«ش ق و مەملەكەتتىك ساۋلەت-قۇرىلىس باقىلاۋ باسقارماسىنا وسكەمەندەگى قۇرىلىس تىعىزدىعىن تەكسەرۋدى تاپسىردىم. بۇل ادامداردىڭ ءومىر ءسۇرۋ ساپاسىنا تەرىس اسەر ەتپەۋى ءۇشىن ماڭىزدى. قانداي دا ءبىر زاڭبۇزۋشىلىقتار انىقتالسا ءتيىستى شارا قولدانىلادى»، - دەدى وبلىس اكىمى.

اۆتور

تالعاتجان مۇحامەتبەك ۇلى