ەلىمىزدە دەمالىس كۇندەرى 46 گرادۋسقا دەيىن شىلىڭگىر ىستىق بولماق

نۇر-سۇلتان. قازاقپارات - «قازگيدرومەت» ر م ك 24-26 - شىلدەگە ارنالعان اۋا رايى بولجامىن ۇسىندى، دەپ حابارلايدى قازاقپارات.

اتموسفەرالىق فرونتتاردىڭ وتۋىنە بايلانىستى ەلىمىزدىڭ سولتۇستىك ايماقتارىندا جاڭبىر جاۋادى.

24 - شىلدەدە باتىستا، 24-25 - شىلدەدە سولتۇستىك-باتىستا، 25-26 - شىلدەدە ەلدىڭ سولتۇستىگىندە قاتتى جاڭبىر جاۋىپ، نايزاعاي ويناپ، ەكپىندى جەل سوعادى، بۇرشاق جاۋى ىقتيمال.

وڭتۇستىك جانە وڭتۇستىك-باتىستا جاۋىن-شاشىنسىز ىستىق اۋا رايى كۇتىلەدى.

اۋا تەمپەراتۋراسى كۇندىز وڭتۇستىكتە، وڭتۇستىك-باتىستا 38-46 گرادۋسقا دەيىن، وڭتۇستىك-شىعىستا، شىعىستا جانە ورتالىقتا 38-42 گرادۋسقا دەيىن جىلى بولادى دەپ بولجانۋدا.

سولتۇستىكتە اۋا تەمپەراتۋراسى 32-40 گرادۋستان 20-30 گرادۋسقا دەيىن بىرتىندەپ تومەندەۋى ىقتيمال.