قازاقستاندا ۋراننىڭ 469 مىڭ توننا قوسىمشا قورى انىقتالدى
ق ر ەكولوگيا، گەولوگيا جانە تابيعي رەسۋرستار ۆيتسە- ءمينيسترى سەرىكقالي برەكەشيەۆ ورتالىق كوممۋنكاتسيالار قىزمەتىندە ءوتىپ جاتقان بريفينگىدە وسىنداي مالىمەت بەردى.
«جۇمىس ىستەپ تۇرعان كاسىپورىنداردىڭ مينەرالدىق- شيكىزات الەۋەتىن نىعايتۋ جانە شيكىزات بازاسىن قامتاماسىز ەتۋ ءۇشىن 1991 -جىلدان باستاپ جۇرگىزىلگەن گەولوگيالىق بارلاۋ جۇمىستارىنىڭ ناتيجەلەرى بويىنشا العاش رەت كومىرسۋتەگى شيكىزاتىنىڭ 135 كەن ورنى، جەراستى سۋلارىنىڭ 99 كەن ورنى، قاتتى پايدالى قازبالاردىڭ 224 كەن ورنى مەملەكەت مەنشىگىنە الىندى. ونىڭ ىشىندە 94 - التىن، 14 - مىس، 19 - مارگانەتس كەندەرىنىڭ، 16 - تەمىر كەندەرىنىڭ، 4 - پوليمەتالداردىڭ قورى بار»، - دەگەن ءمينيستردىڭ ورىنباسارى بىرنەشە ەسكى كەنىشتەردىڭ قورى قوسىمشا بارلاۋ ارقىلى كوبەيتىلگەنىن اتادى.
«بۇرىن زەرتتەلگەن كەن ورىندارىنىڭ شيكىزات بازاسى ۇلعايتىلدى. ۆاسيلكوۆسكي كەن ورنىنىڭ قورلارى بىرنەشە ەسە ءوستى. جەر قويناۋىن پايدالانۋشىلاردىڭ ءوز كۇشىمەن جۇرگىزگەن بارلاۋ جۇمىستارىنىڭ قورىتىندىسى التىننىڭ - 1,9 مىڭ توننا، ۋراننىڭ - 469 مىڭ توننا؛ مارگانەتس كەنىنىڭ - 160,7 ميلليون توننا، تەمىر كەنىنىڭ- 2,9 ميلليارد توننا، مۇنايدىڭ - 2,5 ميلليارد توننا، گازدىڭ - 506 ميلليارد تەكشە مەتر، گاز كوندەنساتىنىڭ - 277,2 ميلليون توننا قورى انىقتالدى»، - دەدى ۆيتسە- مينيستر.
اۆتور: ەسىمجان ناقتىباي