پوليتسياعا پارا ۇسىنعان جۇرگىزۋشى 465 مىڭ تەڭگە ايىپپۇل ارقالادى

كوكشەتاۋ. قازاقپارات - اقمولا وبلىسىندا پاترۋلدىك پوليتسيا ينسپەكتورىنا پارا ۇسىنعان جۇرگىزۋشىگە قاتىستى سوت ۇكىمى شىقتى.

سوت ەر ادامعا 465 مىڭ تەڭگە ايىپپۇل، 15 تاۋلىككە اكىمشىلىك قاماققا الۋ جانە ءومىر بويىنا مەملەكەتتىك قىزمەتتە قىزمەت اتقارۋ قۇقىعىنان، 8 جىلعا كولىك باسقارۋ قۇقىنان ايىرۋ جازالارىن تاعايىندادى، دەپ حابارلايدى قازاقپارات ءتىلشىسى وبلىستىق سوتتىڭ باسپا ءسوز قىزمەتىنە سىلتەمە جاساپ.

سوتتا انىقتالعانداي، سوتتالۋشى تۇندە ماس كۇيىندە اۆتوماشينانىڭ جارىق شامدارىن قوسپاي، قالا ىشىندە جۇرگەن. سول سەبەپتى، ونىڭ كولىگىن پاترۋلدىك پوليتسيا ينسپەكتورلارى توقتاتقان.

ەر ادام جىبەرگەن زاڭ بۇزۋشىلىقتار ءۇشىن جاۋاپقا تارتىلاتىنىن جانە كولىك قۇرالدارىن باسقارۋ قۇقىعىنان ايىرىلاتىنىن ءتۇسىنىپ، جاساعان ارەكەتتەرى ءۇشىن جاۋاپتان قۇتىلۋ ءۇشىن ينسپەكتورعا اقشا ۇسىنعان.

«لاۋازىمدى ادامعا پارا بەرگەنى ءۇشىن قىلمىستىق جاۋاپكەرشىلىك تۋرالى بىرنەشە رەت ەسكەرتۋلەرگە قاراماستان، سوتتالۋشى پاترۋلدىك كولىكتىڭ ىشىنە 31000 تەڭگە اقشا سالدى. وسىعان بايلانىستى پوليتسيا قىزمەتكەرلەرى ونىڭ زاڭسىز ارەكەتتەرىن تىركەپ، جەدەل بولىمگە حابارلادى. قىلمىستىق ءىس سوتقا ءىس جۇرگىزۋ كەلىسىممەن ءتۇستى. سوتتالۋشى كىناسىن تولىق مويىندادى»، - دەدى ۆەدومستۆودان.

سوت ۇكىمىمەن ەر ادام لاۋازىمدى ادامعا پارا بەرگەنى ءۇشىن قىلمىستىق كودەكستىڭ 367-بابىنىڭ 1-بولىگى بويىنشا كىنالى دەپ تانىلدى جانە وعان مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرا وتىرىپ، 465000 تەڭگە مولشەرىندە 15 ەسەلەنگەن پارا سوماسىندا ايىپپۇل تاعايىندالدى. الىنعان پارا سوماسى مەملەكەت كىرىسىنە اۋدارىلدى.

«بۇدان باسقا، ەر ادامعا قاتىستى جول ەرەجەلەرىن بۇزعانى جانە پوليتسيا قىزمەتكەرىنىڭ ماس كۇيىنە كۋالاندىرۋدان ءوتۋ تۋرالى زاڭدى تالابىن ورىنداماعانى ءۇشىن اكىمشىلىك قۇقىق بۇزۋشىلىقتار تۋرالى ەكى حاتتاما جاسالدى، ولار بويىنشا وعان 15 تاۋلىككە اكىمشىلىك قاماققا الۋ، كولىك قۇرالىن باسقارۋ قۇقىعىنان 8 جىلعا ايىرۋ جانە ايىپپۇل تاعايىندالدى»، - دەپ تولىقتىردى ۆەدومستۆودان.

ۇكىم زاڭدى كۇشىنە ەنگەن جوق.

ۇكىمدى جاريا ەتۋگە سىبايلاس جەمقورلىققا جانە ونىڭ كورىنىستەرىنە توزبەۋشىلىكتى قالىپتاستىرۋ ماقساتىندا، پوليتسيا قىزمەتكەرلەرى شاقىرىلدى.

ايتا كەتسەك، بۇدان بۇرىن اقمولا وبلىسىندا لاۋازىمدى تۇلعاعا پارا بەرگەن اكىم سوتتالعانىن جازعان ەدىك.