الماتى اۋەجايى باسشىسىنىڭ جالاقىسى 45 مىڭ دوللار ەكەنى راس پا؟
الماتى اۋەجايىنىڭ وكىلدەرى بۇل اقپاراتقا تۇسىنىك بەردى، - دەپ حابارلايدى Massaget.kz ءتىلشىسى.
اۋەجاي باسشىسىنىڭ جالاقىسى تۋرالى اقپاراتتى ەكونوميكا ساراپشىسى دەنيس كريۆوشەيەۆ Facebook-پاراقشاسىندا جازعان بولاتىن.
«تۇسىمىزدە دە كورمەگەن شىعارمىز. تۇركيالىق مەنەدجەر، قازىرگى الماتى اۋەجايىنىڭ باسشىسى الپ ەر تۋنگا ەرسويدىڭ جالاقىسى 45 مىڭ دوللار نەمەسە ايىنا 20 ميلليون تەڭگە. بۇل ونىڭ تۇراتىن ءۇيى، ۇشۋىن ەسەپتەمەگەندەگى سوما»، - دەيدى ساراپشى.
بۇل اقپاراتقا قاتىستى الماتى اۋەجايىنىڭ وكىلى جاۋاپ بەردى.
«الەۋمەتتىك جەلىلەردە تاراتىلاتىن اقپارات شىندىققا جاناسپايدى. كومپانيا قىزمەتكەرلەرىنە قاتىستى اقپارات جاريالاۋعا جاتپايتىنىن حابارلايمىز. الماتى حالىقارالىق اۋەجايى جالعان اقپاراتتىڭ تارالۋىنا بايلانىستى قۇقىقتىق سالادا ودان ءارى ارەكەت ەتۋ قۇقىعىن ساقتايدى»، - دەيدى اۋەجايدىڭ كورپوراتيۆتىك كوممۋنيكاتسيالار دەپارتامەنتى وكىلدەرى.