مەكسيكادا ادام دەنەسىنىڭ بولىكتەرى سالىنعان 45 قاپ تابىلدى
جەرگىلىكتى بيلىك مايىتتەردى وتكەن اپتادا ءىز-ءتۇزسىز جوعالىپ كەتكەن كولل-ورتالىقتىڭ جەتى قىزمەتكەرىن ىزدەپ جاتقاندا تاپتى.
قاپتاردا ايەل مەن ەر ادامداردىڭ سۇيەگى بار، ناقتى سانى ازىرگە بەلگىسىز.
جەرگىلىكتى جەردىڭ بەدەرى قيىن ءارى جارىق بولماعاندىقتان ىزدەۋ جۇمىسى بىرنەشە كۇنگە جالعاسادى دەگەن بولجام بار.
باتىستاعى حاليسكو شتاتىنىڭ مەملەكەتتىك پروكۋراتۋراسى جەتى ادامنىڭ جوعالعانى تۋرالى اقپارات تۇسكەننەن كەيىن ميرادور-دەل-بوسكە سايىنا ءتىنتۋ جۇرگىزگەنىن مالىمدەدى. سول جەردەن دەنە بولىكتەرى سالىنعان قاپ تابىلدى.
جەرگىلىكتى ءورت ءسوندىرۋ جانە ازاماتتىق قورعانىس قىزمەتى پوليتسيامەن جانە تىكۇشاق ەكيپاجىمەن بىرلەسىپ قالدىقتاردى جويۋمەن اينالىستى.
ءبىرىنشى قاپ سەيسەنبى كۇنى تابىلدى، ءبىراق ايماقتىڭ بەدەرى كۇردەلى بولعاندىقتان ءارى كۇن ساۋلەسى تۇسپەگەندىكتەن ىزدەۋ جۇمىستارى سارسەنبى كۇنى جالعاستى. بارلىق سۇيەك تابىلعانشا ىزدەۋ جالعاسا بەرەدى، دەپ حابارلادى پروكۋراتۋرا.
مايىتتەر سانى، ولاردىڭ كىم ەكەنى جانە نە ءۇشىن قازا تاپقانىن انىقتاۋ جالعاسادى.
سونداي-اق جەرگىلىكتى بيلىك ءىز-ءتۇزسىز جوعالعان جەتى ادامدى ىزدەۋدى دە جالعاستىرا بەرەدى.
مايىتتەردىڭ سايعا قالاي تاستالعانى ازىرگە بەلگىسىز، الايدا مەكسيكادا ادامدار ءجيى جوعالادى. مۇنداي قىلمىس ءتۇرى مەكسيكادا كەڭ تاراعان.
رەسمي دەرەكتەر بويىنشا، مەكسيكادا 100000 نان استام ادام ءىز-ءتۇزسىز جوعالعاندار قاتارىندا، ولاردىڭ كوبى ۇيىمداسقان قىلمىس قۇرباندارى بولعان. قىلمىسكەرلەردىڭ جازالانۋى دا سيرەك قۇبىلىس.
ۇكىمەت دەرەگى بويىنشا، جوعالىپ كەتۋ جاعدايلارى 2007-جىلدان، سول كەزدەگى پرەزيدەنت فەليپە كالدەرون «ەسىرتكىمەن كۇرەس» جاريالاعاننان كەيىن باستالعان.
ءىز-ءتۇزسىز جوعالعانداردىڭ ۇشتەن ءتورت بولىگى ەر ادام، ال بەستەن ءبىرى جوعالعان كەزدە 18 جاسقا تولماعان قىز بالا بولعان.
جوعالعان ازاماتتاردىڭ تۋىستارى ۇكىمەت ولاردى تابۋ ءۇشىن ەشقانداي كۇش جۇمسامايتىنىنا، ولاردىڭ قايعىسىنا بەي-جاي قارايتىنىنا وكپەلى.
مەكسيكانىڭ حاليسكو شتاتى ناركوكارتەلدەردىڭ قانقۇيلى سوعىس ورتالىعىنا اينالعان. ال وندا ارەكەت ەتەتىن ەڭ ىقپالدىلارى - «نوۆوە پوكولەنيە حاليسكو» جانە Nueva Plaza توپتارى.