نۇرعالي ءنۇسىپجانوۆ وزىنەن 45 جاس كىشى جادىرا سەيدەشكە نەلىكتەن ۇيلەنگەنىن ايتتى
ءانشى سەكسەننىڭ سەڭگىرىنەن اسقاندا نەلىكتەن ۇيلەنگەنىن، جار رەتىندە تانىمال جۋرناليست جادىرا سەيدەشتى تاڭداۋىنا نە سەبەپ بولعانىن ايتتى.
بۇل تۋرالى Stan.kz اقپارات اگەنتتىگى Shownews.kz اقپارتتىق پورتالىنا سىلتەمە جاساپ حابارلايدى.
حالىق ءارتىسىنىڭ شاڭىراق كوتەرۋى، وزىنەن 45 جاس كىشى جادىرا سەيدەشتى جار ەتۋى كوپشىلىكتىڭ قىزۋ تالقىسىنا تۇسكەن ەدى. ولاردىڭ قاتارىندا ءنۇسىپجانوۆتى سىناعاندار دا از ەمەس. ءوز كەزەگىندە ءانشى وزىنە سىن ايتقاندارمەن داۋلاسقىسى كەلمەيتىنىن جەتكىزدى.
«مەن حالىقتىڭ بايلىعىنا قول سۇققانىم جوق. بىرەۋدىڭ يەلىگىن تارتىپ العان جوقپىن. ءوز ىقىلاسىمىزبەن، ءوز كەلىسىمىمىزبەن قوسىلدىق. مەن جاس بالا ەمەسپىن. مەنىڭ دە استى- ۇستىمە قارايتىن كومەكشى، سەنىمدى ادام كەرەك. قازىرگى زاماندا ءومىر ءسۇرۋ وڭاي ەمەس. پەيىلى دۇرىس، كوزى كورە الاتىن، قۇلاعى ەستي الاتىن جاندار باتالارىن بەرىپ جاتىر. ال ەندى ءبىرى قيسىق سوزدەرىن جىبەرىپ، ادامداردىڭ قۇلاعىن بىلعاپ جاتقاندار دا بار. ولارعا ايتار ءسوزىم جوق. بىرەۋمەن ايقايلاسۋ ويىمدا دا جوق. مەنىڭ ومىرلىك ۇستانىمىم - ەشكىمنىڭ الا ءجىبىن اتتاماۋ»، - دەيدى ءنۇسىپجانوۆ.
ونەر يەسىنىڭ كەلىنشەگىمەن تانىستىعى وسىدان 5 جىل بۇرىن باستاۋ العان. نۇرعالي ءنۇسىپجانوۆتىڭ سوزىنشە، ول بولاشاق جارىن تۇسىرىلىمدەردىڭ بىرىندە جولىقتىرىپتى. جۋرناليست قىزدىڭ ادالدىعى، ساۋاتتىلىعى مەن ەڭبەكقورلىعى حالىق ءارتىسىن ءتانتى ەتكەن كورىنەدى.
«قىمىزدى كىم ىشپەيدى، قىزبەن كىم سويلەسپەيدى. بۇل تالقىلاناتىن ۇلكەن ءبىر تاقىرىپ ەمەس. ادامداردىڭ وي ارمانى، ادامدىق قاسيەتتەرى جاقىنداسادى. كەز- كەلگەن اداممەن ءتىل تابىسىپ كەتە المايسىڭ. جادىرانى تۇسىرىلىمدە جولىقتىردىم. ءبىز سۇحباتتاردا دا كەزدەسىپ جۇرەتىنبىز. ونىڭ ىستەگەن ەڭبەكتەرىن باعالادىم. كەلىنشەگىمنىڭ ادالدىعى، ساۋاتتىلىعى مەن ەڭبەكقورلىعى مەنى ءتانتى ەتتى. بۇل نەكە ەكى جاقتىڭ كەلىسىمىمەن، ريزالىعىمەن بولدى»، - دەدى ونەر يەسى.
سونداي- اق، ءانشى سەكسەننەن اسقان شاعىندا ءۇشىنشى رەت شاڭىراق كوتەرۋىنە قىزدارىنىڭ قارسى بولماعانىن ايتىپ، ريزالىعىن جەتكىزدى.
«بۇل نەكەنى قىزدارىم جاقسى قابىلدادى. قارسىلىق تانىتپادى. كەرىسىنشە ماعان قولداۋ كورسەتىپ، تۇسىنىكپەن قابىلدادى. قىزدارىما ريزامىن»، - دەدى ءانشى.
سونداي- اق، نۇرعالي ءنۇسىپجانوۆ الداعى ۋاقىتتا شىعارماشىلىعىن قولعا الىپ، ەل ايماقتارىن ارالاپ، جەكە ءان كەشىن وتكىزۋدى جوسپارلاپ وتىرعانىن ايتتى.