قىتايدا پنيەۆمونيانىڭ ءورشۋى: 440 ادام جۇقتىرىپ، 9 ى كوز جۇمدى
بۇل تۋرالى سارسەنبى كۇنى ق ح ر مەملەكەتتىك كەڭەسى باسپا ءسوز كەڭسەسىنىڭ بريفينگىندە قىتاي مەملەكەتتىك گيگيەنا جانە دەنساۋلىق ساقتاۋ ماسەلەلەرى كوميتەتى ديرەكتورىنىڭ ورىنباسارى لي بين ءمالىم ەتتى، دەپ حابارلايدى «قازاقپارات» ح ا ا مەنشىكتى ءتىلشىسى.
«21- قاڭتار ساعات 24:00 دەگى جاعداي بويىنشا، 13 پروۆينتسيادا كوروناۆيرۋستىڭ جاڭا ءتۇرىن جۇقتىرعان 440 ادامنىڭ تىركەلگەنى جانە 9 ادامنىڭ قايتىس بولعانى تۋرالى دەرەكتەر الىندى»، - دەپ مالىمدەدى لي بين.
ناۋقاستارمەن بايلانىستا بولعان 2197 ادام وقشاۋلاندىرىلدى. ولاردىڭ باسىم بولىگى اۋرۋحانادان شىعارىلدى، دەگەنمەن 1394 ادام كارانتيندە.
باسپا ءسوز ءماسليحاتىندا اتاپ وتىلگەندەي، زەرتتەۋ ناتيجەسى اۋرۋ جۇقتىرعانداردىڭ كوپشىلىگى ۋحان قالاسىمەن بايلانىستى ەكەنىن كورسەتكەن.
«ۆيرۋس قالاي پايدا بولعانى انىقتالعان جوق. ونىڭ قالاي جۇعاتىنى دا تولىقتاي زەرتتەلمەدى. ۆيرۋستىڭ مۋتاتسيالانىپ، ەپيدەميانىڭ ءارى قاراي تارالۋ قاۋپى بار»، - دەدى لي بين.
سارسەنبى كۇنى جەنيەۆاداعى دۇنيەجۇزىلىك دەنساۋلىق ساقتاۋ ۇيىمى قىتايدا كوروناۆيرۋستىڭ جاڭا ءتۇرىنىڭ تارالۋىنا بايلانىستى شۇعىل جينالىس وتكىزەتىنى كۇتىلۋدە.