مۇقتاج وتباسىنداعى ءبىر بالانى مەكتەپكە دايىنداۋعا 43 مىڭ تەڭگەدەن بەرىلدى
الماتى قالاسى اكىمدىگىنىڭ مالىمەتىنشە، «جالپىعا مىندەتتى وقۋ» قورىنان الەۋمەتتىك وسال توپتاعى وقۋشىلارعا ارنالعان كومەكتىڭ سوماسى - ءبىر بالاعا 43 مىڭ تەڭگەنى قۇرايدى.
«بۇل ماقساتقا جەرگىلىكتى بيۋدجەتتەن جالپى 847 ميلليون تەڭگە ءبولىندى. قازىرگى تاڭدا قاراجات 16 مىڭ وقۋشىنىڭ اتا- اناسىنىڭ شوتىنا اۋدارىلدى. بارلىعى 20 مىڭعا جۋىق وقۋشى ماتەريالدىق كومەك الادى.
«مەكتەپكە جول - شەكاراسىز جاقسىلىق» رەسپۋبليكالىق اكتسياسى اياسىندا 1 مىڭنان استام بالاعا كومەك كورسەتىلدى. دەمەۋشىلەر مەن مەتسەناتتار بولگەن 17,3 ميلليون تەڭگەگە مەكتەپ فورماسى مەن كەڭسە تاۋارلارى ساتىپ الىنىپ، تاراتىلدى»، - دەلىنەدى اكىمدىك حابارلاماسىندا.
وسىعان وراي الماتى اكىمدىگى يگى ىسكە بەي- جاي قارامايتىن قالا تۇرعىندارىنا اكسياعا اتسالىسىپ، مۇقتاج بالالارعا كومەك كورسەتە الاتىندارىن جەتكىزدى. اكسيا 30 -قىركۇيەككە دەيىن جالعاسادى.