08:31, 10 - قىركۇيەك 2019 | GMT +6
ءالپى تاۋلارىندا 43 جىل بۇرىن جوعالعان ءالپينيستىڭ ءمايىتى تابىلدى
نۇر-سۇلتان. قازاقپارات - ءالپى تاۋلارىندا فرانسۋزدىق قۇتقارۋ قىزمەتى 43 جىلدان بەرى مۇز باسىپ جاتقان ءالپينيستىڭ ءمايىتىن تاپتى، دەپ حابارلايدى AFP.
اگەنتتىكتىڭ اقپاراتىنا قاراعاندا، بۇل 1976-جىلعى 25- شىلدەدە ساياحات جاساۋعا كەتىپ، سودان قايتا ورالماعان 20 جاستاعى جانا-فرانسۋا بەنەدەتتيدىڭ دەنەسى بولۋى مۇمكىن.
بىرنەشە جىل بويى ونىڭ اكەسى ىزدەستىرگەن بولاتىن. ءبىراق ەش ناتيجە بولماعان.
اكەسى ومىردەن وزعاننان سوڭ ىزدەۋ جۇمىستارىمەن ءالپينيستىڭ اعاسى جانە دوستارى شۇعىلداندى. ولار قۇتقارۋشىلارعا «قىزعىلت سارى داقتى» كورگەندەرىن حابارلاعان.
وقيعا ورنىنا بورتىندا ەكى قۇتقارۋشى بار تىكۇشاق اتتانعان. ولار سول جەردەن قىزعىلت سارى ءتۇستى كيىم جىرتىندىلارىن جانە ادام قاڭقاسىن تابادى.
قۇتقارۋشىلاردىڭ ويىنشا، قاڭقا - 43 جىل بۇرىن جوعالعان ءالپينيستىڭ سۇيەگى. ولاردىڭ بولجامىنشا، جىلىمىق سالدارىنان مۇزدىقتار ەرىپ، مۇردە اشىلىپ قالعان.