ەلباسى مەدالى: شىعىس قازاقستاندا 438 جاس جوباعا قاتىسۋعا ءوتىنىش بەرگەن

None
None
وسكەمەن. قازاقپارات - شىعىس قازاقستان وبلىسىندا «ەلباسى مەدالى» جوباسىنا قاتىسۋعا 438 ادام ءوتىنىش بىلدىرگەن، دەپ حابارلايدى قازاقپارات ءتىلشىسى.

«ەلباسى مەدالى» بەلسەندى جانە تالاپتى جاستاردى قولداۋعا باعىتتالعان جوبا. وعان «تۇڭعىش پرەزيدەنت» قورى قولداۋ كورسەتۋدە.

بۇل تۋرالى ش ق و اقپارات ورتالىعىندا وتكەن باسپا ءسوز بريفينگى بارىسىندا وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆا مالىمدەدى.

«جوباعا قاتىسۋشىلارعا جەتى باعىت ۇسىنىلادى. اتاپ ايتساق، «سپورت جانە دەنە شىنىقتىرۋ»، «كىتاپ وقۋ»، «دارىن مەن داعدى»، «ۇلتتىق مۇرا»، «ەرىكتىلىك»، «تۋريستىك ساياحاتتار» جانە «ەڭبەك تاجىريبەسى». باعدارلامانى ازىرلەۋ بارىسىندا ۇزدىك الەمدىك تاجىريبە قولدانىلعان. بايقاۋدىڭ شارتى بويىنشا وعان 14 پەن 29 جاس ارالىعىنداعى جاستار قاتىسا الادى»، - دەدى ول.

باسقارما باسشىسىنىڭ ايتۋىنشا، «ەلباسى مەدالىن» ءاربىر قازاقستاندىق جاس بۋىن يەلەنە الادى.

باعدارلاماعا قاتىسۋ ءۇشىن me.fpp.kz ونلاين پلاتفورماسىنا تىركەلىپ، ۇسىنىلعان «التىن»، «كۇمىس» نەمەسە «قولا» باعىتتارىن تاڭداۋ كەرەك.

«قاتىسۋشىلار تالىمگەردىڭ كومەگىمەن جەكە دامۋ باعدارلاماسىن جاسايدى. ءتىپتى وعان مۇمكىندىگى شەكتەۋلى جاندار دا قاتىسا الادى. مەدال يەگەرلەرىنىڭ ۇپايلارى تەڭ بولعان جاعدايدا ق ر زاڭناماسىندا بەلگىلەنگەن تارتىپپەن ءبىلىم گرانتىن جانە وبلىس اكىمىنىڭ گرانتىن الۋعا تولىق قۇقىعى بار. ارينە، بۇل - جاعىمدىق جاڭالىق. ءبىزدىڭ وبلىستا دا «ەلباسى مەدالى» باعدارلاماسىن دامىتۋعا بارلىق جاعداي جاسالدى. وعان ايماق باسشىسى دانيال احمەتوۆ تە قولداۋ كورسەتىپ وتىر. بۇگىندە بۇل جوباعا قاتىسۋعا 438 شىعىسقازاقستاندىق ءوتىنىش ءبىلدىردى. الداعى ۋاقىتتا ولاردىڭ سانى ارتادى دەپ سەنەمىز»، - دەدى سايرانگۇل ءجۇمادىلوۆا.

سوڭعى جاڭالىقتار