قازاقستانعا كوشەتىن قانداستاردان تالاپ ەتىلەتىن قۇجات سانى 43 تەن 20 عا دەيىن قىسقارادى
بۇل تۋرالى ەلوردادا ءوتىپ جاتقان «وتانداستار. بولاشاققا باعدار» اتتى حالىقارالىق دوڭگەلەك ۇستەلدە ق ر اقپارات جانە قوعامدىق دامۋ ءمينيسترى داۋرەن ابايەۆ ءمالىم ەتتى، دەپ حابارلايدى قازاقپارات ءتىلشىسى.
مينيستر الەمنىڭ 43 ەلىندە 5-6 ميلليون قازاق تۇراتىنىن اتاپ ءوتتى. بۇل - قازاق ەتنوسىنىڭ ۇشتەن ءبىر بولىگى.
«ءبىز شەتەلدەگى قانداستاردى قولداۋدىڭ جاڭا تەتىگىن كەشەندى تۇردە پىسىقتاپ جاتىرمىز. ول - حالىقارالىق تاجىريبەگە نەگىزدەلگەن مەحانيزم. ەكىنشىدەن، مينيسترلىك ەتنيكالىق قازاقتاردىڭ ەلىمىزگە كوشۋ ءراسىمىن وڭتايلاندىرۋعا باعىتتالعان جۇيەلى شارالار ازىرلەۋ بويىنشا ۇلكەن جۇمىس جۇرگىزدى. ءبىز ادامداردىڭ «قانداس» مارتەبەسىن الۋعا ءوتىشىن بەرۋىنەن باستاپ قازاقستاندىق پاسپورت بەرگەنگە دەيىن بارلىق پروتسەستى تالداپ، كەلەسى شارالاردى تاڭدادىق: قانداستاردان سۇرالاتىن قۇجات سانىن 46-دان 20-عا دەيىن قىسقارتامىز»، - دەدى ول.
داۋرەن ابايەۆ قۇجات راسىمدەۋ بويىنشا بارلىق قىزمەت تەك ءبىر جەردەن – ح ق و- دا «ءبىر تەرەزە» قاعيداتى بويىنشا كورسەتىلەتىنىن اتاپ ءوتتى.
«بۇل رەتتە العاشقى ءوتىنىشتى قازاقستانعا كەلمەي-اق ءبىزدىڭ شەتەلدەگى ەلشىلىكتەرىمىزدىڭ كونسۋلدىعىنا بەرۋگە بولادى. قانداستارعا ۋاقىت جانە قاراجات جاعىنان ءتيىمدى بولۋى ءۇشىن وسى ماسەلەنى ەسكەردىك. وعان قوسا قۇجات راسىمدەۋ بويىنشا قىزمەت كورسەتۋ مەرزىمى 6 ايدان 3 ايعا دەيىن قىسقارادى. وسى جۇمىستىڭ بارلىعىن ورىنداۋ ءۇشىن جول كارتاسىن ازىرلەدىك. سوعان ساي، بارلىق مەملەكەتتىك ورگان قاجەتتى قۇقىقتىق جانە ۇيىمداستىرۋ شارالارىن قابىلداۋى ءتيىس. بۇل ءبىرىڭعاي تەرەزە 2020 -جىلدىڭ ءۇشىنشى توقسانىنىڭ سوڭىندا تولىق كۇشىنە ەنەدى»، - دەدى ول.
اۆتور: ايان بەكەن ۇلى