ارىستىق جىگىت سالماعى 43 كەلى بولاتىن قوشقاردى 1111 رەت كوتەردى

تۇركىستان. قازاقپارات - ارىس قالاسىنىڭ تۇرعىنى ازامات ماقۇلبەكوۆ سالماعى 43 كەلى بولاتىن قوشقاردى 1111 رەت كوتەردى، دەپ حابارلايدى قازاقپارات ءتىلشىسى.

بۇگىن ارىس قالاسىندا قالا كۇنى مەرەكەسى ءوتتى. اتالعان شارا بارىسىندا ۇلتتىق سپورت تۇرلەرىنەن جارىس ۇيىمداستىرىلدى. ۇلتتىق سالت-داستۇرلەرىمىز دارىپتەلىپ، سالاۋاتتى ءومىر سالتى ناسيحاتتالعان شاراعا جەرگىلىكتى تۇرعىندارمەن بىرگە شىمكەنت قالاسى، قازىعۇرت جانە ورداباسى اۋدانىنىڭ جاستارى قاتىستى.

سپورتتىق سايىستاردىڭ ىشىندە كوپشىلىكتىڭ نازارىن اۋدارعانى «قوشقار كوتەرۋ» سايىسى بولدى. قاتىسۋشىلار اراسىندا ءوزىنىڭ مىقتىلىعىن دالەلدەپ، سالماعى 43 كەلى بولاتىن قوشقاردى 1111 رەت كوتەرگەن ازامات ماقۇلبەكوۆ باس جۇلدەنى يەلەندى. ال، قوشقاردى 160 رەت كوتەرگەن ءماجيت ارحات ەكىنشى ورىندى، 150 رەت كوتەرگەن دانيار ايتبەك ءۇشىنشى ورىندى يەلەندى.

جارىس جەڭىمپازى ازامات ماقۇبەكوۆكە ءوزى كوتەرگەن قوشقار بەرىلسە، قالعان جۇلدەگەرلەر مەن قاتىسۋشىلارعا ۇيىمداستىرۋشىلار باعالى سىيلىقتار تابىستادى.

ءبىر قىزىعى، ەرلەردەن سوڭ قوشقار كوتەرۋ كەزەگىن العان ارىستىق ءادىل اقنۇر ەسىمدى ارۋ ءبىرقاتار جىگىتتى شاڭ قاپتىرىپ، 64 رەت كوتەردى. كەلۋشىلەردى تاڭقالدىرعان جىگەرلى ارۋعا دا ارنايى سىيلىق تابىس ەتىلدى.

سول سياقتى بارلىق سپورت تۇرىنەن جۇلدەلى ورىن العان قاتىسۋشىلار ارنايى العىس حاتپەن ماراپاتتالىپ، ولاردىڭ بارىنە تۇرمىستىق تەحنيكالار سىيعا تارتىلدى.