گايتيدە سۋ تاسقىنىنان 42 ادام قازا تاپتى

پورت- و- پرەنس. قازاقپارات - وتكەن دەمالىس كۇندەرى گايتيدە نوسەر جاۋىن سالدارىنان مىڭداعان ءۇي سۋ استىندا قالدى، 42 ادام قازا تاۋىپ، تاعى 85 ءى جاراقات الدى، دەپ حابارلايدى قازاقپارات CNN گە سىلتەمە جاساپ.

بىرىككەن ۇلتتار ۇيىمىنىڭ اقپاراتىنشا، قاتتى جاڭبىردان سوڭ گايتيدە بىرنەشە وزەن ارناسىنان شىعىپ، بۇل ءوز كەزەگىندە سۋ تاسقىنىنا، تاس جانە لاي كوشكىنىنە اكەلىپ سوققان.

سۋ تاسقىنى سالدارىنان 13300 دەن استام ادام ءۇيىن تاستاپ كەتۋگە ءماجبۇر بولدى.

گايتيدەگى 10 دەپارتامەنتتىڭ بەسەۋىندە: باتىس، نيپپەس، وڭتۇستىك- شىعىس، سولتۇستىك- باتىس جانە ورتالىقتا تاعى 11 ادام ءىز- ءتۇزسىز جوعالدى.

«ۇكىمەت ۇلتتىق جانە حالىقارالىق ينستيتۋتتارمەن بىرلەسىپ، جاعدايدى شەشۋ ءۇشىن شۇعىل شارالار قابىلداپ جاتىر»، - دەپ جازدى گايتي پرەمەر- ءمينيسترى اريەل انري Twitter پاراقشاسىندا.

دۇيسەنبىدە جاۋعان جاۋىن- شاشىننىڭ سالدارىنان قازا تاپقاندار سانى تاعى ءوستى.

سۋ تاسقىنىنان زارداپ شەككەندەرگە كومەك كورسەتۋگە شۇعىل ارەكەت ەتۋ توپتارى مەن كومەك كورسەتۋ ۇيىمدارى جۇمىلدىرىلدى.

گايتي گۋمانيتارلىق كومەككە مۇقتاج.

سۋ تاسقىنى قاۋپى 1-ماۋسىمدا باستالعان داۋىل ماۋسىمىندا جالعاسادى دەپ بولجانىپ وتىر.