ءۇش جىلدا قازاق حالقىنىڭ 42 پايىزى اشتىق قۇربانى بولدى - جانسەيىت تۇيمەبايەۆ

نۇر-سۇلتان. قازاقپارات - قازاقستان حالقى اسسامبلەياسى ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارناپ كەشەندى ءىس شارالار وتكىزىپ جاتىر، دەپ حابارلايدى قازاقپارات ءتىلشىسى.

«تاريحتان تاعىلىم - وتكەنگە تاعزىم» دەگەن اتپەن وتكەن كەشەندى ءىس-شارا بيىل اقمولا وبلىسىنىڭ اقمول اۋىلىنداعى «الجير» مەموريالدى-مۇراجاي كەشەنىندە باستالدى. تاڭعى ساعات 9.00-دەن باستاپ ازا تۇتۋعا جينالعان حالىق ەسكە الۋ تاقتاسىنا گۇل شوقتارىن قويىپ، ساياسي قۋعىن-سۇرگىن قۇرباندارىنىڭ رۋحىنا تاعزىم ەتتى.

جينالعان جالپى جۇرتقا «الجير» مۋزەيىنىڭ بىرەگەي ەكسپوناتتارى كورسەتىلىپ، «الجير-دىڭ جان توزگىسىز ىزعارى» اتتى دەرەكتى ءفيلمى كورسەتىلدى.

شارادا ءسوز سويلەگەن قازاقستان حالقى اسسامبلەياسى ءتوراعاسىنىڭ ورىنباسارى جانسەيىت تۇيمەبايەۆ ءۇش جىلدا، ياعني 1931-1933 -جىلداردا حالقىمىزدىڭ 42 پايىزى قۇربان بولعانىن ايتتى.

«اشارشىلىقتان كەيىنگى 37-38 -جىلدارداعى ستاليندىك رەپرەسسيا دا حالقىمىز ءۇشىن وتە اۋىر سوققى بولدى. ءجۇز مىڭنان استام ادامعا «حالىق جاۋى» دەگەن تاڭبا تاعىلدى. ولاردىڭ كوبى اتىلىپ كەتتى، قالعاندارى لاگەرلەردىڭ بار ازابىن باستان كەشتى. قۋعىن- سۇرگىنگە ۇشىراعانداردىڭ العى شەبىندە الاش ارىستارى مەن قازاق زيالىلارى قۇربان بولدى. جازىقسىز قۇرباندار رۋحىنا باس ءيىپ، تاعزىم ەتۋ - بارشامىزدىڭ پارىزىمىز»، - دەدى اسسامبلەيا حاتشىسى.

ەسكە الۋ شارالارى كەشكە دەيىن جالعاسپاق. ساعات.14.00-دە نۇر-سۇلتان قالاسىندا «1932-1933 -جىلدارداعى اشارشىلىق قۇرباندارىنىڭ مونۋمەنتى» ەسكەرتكىشىنە گۇل قويۋ ءراسىمى وتسە، ساعات 17.00-دە «قازاق ەلىنە مىڭ العىس» مونۋمەنتى الدىندا «ەسكە الۋ ۆاحتاسى» فلەشموبى وتەدى. وعان 250-دەن اسا ادام قاتىسادى دەپ جوسپارلانعان.

ەسكە الۋ كۇنىن ساعات 19.00-دە ق. قۋانىشبايەۆ اتىنداعى قازاق مۋزىكالىق- دراما تەاترىندا باستالاتىن تبيليسي مەملەكەتتىك تەاترىنىڭ «الجير» سپەكتاكلىنىڭ قويىلىمى تۇيىندەيدى.