جەڭىلدەتىلگەن اۆتونەسيە الۋعا نيەت بىلدىرگەن 4290 ازاماتتىڭ ءوتىنىشى ماقۇلداندى
بۇل تۋرالى «ونەركاسىپتى دامىتۋ قورى» ا ق باسقارما ءتوراعاسىنىڭ ورىنباسارى جانار يبراشيەۆا ءمالىم ەتتى، دەپ حابارلايدى قازاقپارات ءتىلشىسى.
«قازىر جەڭىلدەتىلگەن اۆتونەسيە بەرۋ جۇمىسى قارقىندى ءجۇرىپ جاتىر. ازاماتتار ءوتىنىشىن ەكىنشى دەڭگەيلى بانكتەر قابىلداپ جاتىر. قازىرگى ساتتە 4290 ازاماتتىڭ ءوتىنىشى وڭ شەشىمىن تاپتى. وعان بولىنگەن نەسيەنىڭ كولەمى 31,7 ميلليارد تەڭگەنى قۇراپ وتىر. بۇگىندە «بانك سەنتركرەديت»، Halyk Bank جانە ەۋرازيا بانكى ءوتىنىش قابىلداپ جاتىر. ەرتەڭنەن باستاپ بۇل قاتارعا Forte Bank قوسىلادى دەپ وتىرمىز»، - دەدى جانار يبراشيەۆا.
ونىڭ ايتۋىنشا، اۆتونەسيەگە ءوتىنىش بەرۋ جۇمىسى ەل كولەمىندە ءجۇرىپ جاتىر.
«ستاتيستيكا ۇنەمى وزگەرىپ تۇرادى. جوعارىدا ايتىلعان مالىمەت - قازىرگى جايت. جەڭىلدەتىلگەن اۆتونەسيە كادىمگى نەسيە الۋ سەكىلدى. ياعني، الدىمەن كليەنتتىڭ نەسيەنى وتەۋ مۇمكىندىگى قارالادى. سوندىقتان دا كەي كليەنتتەردىڭ ءوتىنىشى كەرى قايتارىلۋى مۇمكىن. بۇل تۋرالى تولىعىراق بانكتەردەن ءبىلۋ كەرەك. اۆتوكولىككە قول جەتكىزۋ دە ءار جاعدايعا بايلانىستى. كليەنت اۆتوسالونعا كەلىپ كولىكتى قارايدى، ەگەر قالاعان ماشيناسى بار بولسا، سول جەردە بىردەن راسىمدەيدى. ەگەر كليەنت قالاعان اۆتوكولىك جوق بولسا، وندا كۇتەدى»، - دەيدى ول.
اتالعان قوردان اۆتونەسيەگە ءوتىنىش بەرۋشىلەر بويىنشا الماتى قالاسى كوش باستاپ تۇر.
ودان بولەك، ۇشتىككە تۇركىستان وبلىسى جانە نۇر-سۇلتان قالاسى كىرىپ وتىر.
ايتا كەتەيىك، 16- مامىردا قازاقستاندا جەڭىلدەتىلگەن اۆتونەسيە بەرۋ باستالدى.