قازاقستان ازاماتتىعىن الماعان قانداستارعا دا 42500 تەڭگە بەرىلەدى

نۇر- سۇلتان. قازاقپارات - قازاقستان ازاماتتىعىن الماعان، الايدا ورالمان مارتەبەسى بار قانداستارعا 42500 تەڭگە بەرىلەدى.

بۇل تۋرالى دۇنيەجۇزى قازاقتارى قاۋىمداستىعىنىڭ باسپا ءسوز حاتشىسى سىرىمبەك تولەۋ ۇلى Facebook جەلىسىندەگى پاراقشاسىندا جازدى، دەپ حابارلايدى قازاقپارات ءتىلشىسى.

«تۇراقتى تىركەۋدە تۇرىپ ورالمان مارتەبەسى بار قازاقتار قۇقىقتارى جاعىنان تۇرعىلىقتى ازاماتتارمەن تەڭ. ولارعا ەشقانداي̆ كەدەرگى جوق جانە قازاقستان رەسپۋبليكاسىنىڭ ازاماتتارىمەن بىردەي كومەك كورسەتىلەدى. ەگەر جۇمىس ىستەپ ءجۇرىپ، تابىسىنان شەكتەۋلەر سالدارىنان اي̆ىرىلعان بولسا، ول 42 500 تەڭگە الادى»، - دەپ جازدى سىرىمبەك تولەۋ ۇلى.

ەسكە سالا كەتسەك كەشەگى ۇكىمەت وتىرىسىندا ۇكىمەت باسشىسى اسقار مامين اتاۋلى الەۋمەتتىك كومەكتى قولدا بار دەرەكتەر نەگىزىندە الدىن الا جۇرگىزۋدى تاپسىرعان ەدى. ال ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ورتالىق كوممۋنيكاتسيالار قىزمەتىندەگى بريفينگ بارىسىندا مينيستر شىلدە ايىنا بەرىلەتىن 42500 تەڭگە الەۋمەتتىك تولەمدى تاعايىنداۋ ءۇشىن قانداي پورتالدار جۇمىس ىستەيتىندىگىن ايتىپ بەردى. ءوز كەزەگىندە ەڭبەك جانە حالىقتى الەۋمەتتىك قورعاۋ مينيسترلىگى اتالعان ساناتتاعى ازاماتتاردىڭ 42500 تەڭگەلىك تولەمدى الا الاتىنىن راستادى.

«مينيستر بۇل سۇراققا Facebook بەتىندە جاۋاپ بەرگەن. دۇرىس. قازاقستان ازاماتى بولسىن، قانداس بولسىن الادى. باستىسى ول بۇعان دەيىن رەسمي تۇردە جۇمىس ىستەپ، تابىسىنىڭ جوعالتقانى راستالۋى ءتيىس»، - دەدى مينيسترلىكتىڭ باسپا ءسوز حاتشىسى الەكسەندر كونونەتس.