ءبىر وتباسى 42500 تەڭگەگە ءومىر سۇرە الا ما - مينيستر جاۋاپ بەردى

نۇر-سۇلتان. قازاقپارات - 42500 تەڭگەگە ءبىر وتباسى ءومىر سۇرە الادى دەپ ەشكىم ەسەپتەگەن ەمەس.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«42500 تەڭگەگە ءبىر وتباسى ءومىر سۇرە الادى دەپ ەشكىم ەسەپتەگەن ەمەس. بۇل - ەڭبەك زاڭناماسى كەپىلدىك بەرەتىن ەڭ تومەنگى ستاندارت. ال ەڭبەك نارىعىندا بۇدان تومەن جالاقى بولماۋى ءتيىس. سوندىقتان تابىسىن جوعالتۋعا بايلانىستى بەرىلەتىن تولەم جايىندا ءسوز بولعاندا بۇل ءبىرىڭعاي ستاندارت - 42500 تەڭگە»، - دەدى مينيستر ورتالىق كوممۋنيكاتسيالار قىزمەتىندەگى بريفينگتە ب ا ق وكىلدەرىنىڭ ساۋالىنا وراي.

سونىمەن قاتار ول ءبىر وتباسىندا بىرنەشە ادام جۇمىس ىستەپ جانە ولاردىڭ بارلىعى كارانتين شارالارىنا بايلانىستى تابىسىنان ايىرىلسا، وندا ولاردىڭ بارلىعى 42500 تەڭگەدەن الەۋمەتتىك تولەم الا الاتىنىن باسا ايتتى.

«ارينە، بۇل كوپ ەمەس. ەگەر وتباسىندا بىرنەشە ادام تابىسىنان ايىرىلسا، وندا ءار ادام وتباسىنداعى ادام سانىنا قاراماستان بۇل تولەمدى الا الادى»، - دەدى ءبىرجان نۇرىمبەتوۆ.