شىمكەنتتىك ايەل تۇرعىندارعا 42500 تەڭگە الۋعا كومەكتەسەمىن دەپ حابارلاما تاراتقان
بۇل قىزمەتىن ول ءاربىر ادامعا مىڭ تەڭگەدەن باعالاعان، دەپ حابارلايدى قازاقپارات ءتىلشىسى.
قالالىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 1- ءساۋىر كۇنى WhatsApp مەسەندجەرى ارقىلى «الەۋمەتتىك تولەم الۋعا كومەكتەسەمىن»، - دەگەن حابارلاما تاراعان.
وندا ازاماتتاردان ج س ن، ج ك اتاۋى، ەلەكتروندى كىلتتەرى مەن تۇرعىلىقتى مەكەنجايى، بانك كارتالارىنىڭ ءنومىرى قاجەت ەكەنى ايتىلعان.
«اتالعان جايت بويىنشا، قىلمىستىق كودەكستىڭ 190-بابى («الاياقتىق») بويىنشا ءىس قوزعالىپ، تىركەۋگە الىندى. ءتارتىپ ساقشىلارى تاراپىنان جەدەل ىزدەستىرۋ شارالارى جۇرگىزىلىپ، وسى قىلمىسقا قاتىسى بار دەگەن 27 جاستاعى ايەل پوليتسيا بولىمشەسىنە جەتكىزىلدى.
قازىرگى تاڭدا پوليتسيا دەپارتامەنتى تاراپىنان سوتقا دەيىنگى تەرگەۋ امالدارى جۇرگىزىلىپ، ونىڭ قورىتىندىسى بويىنشا پروتسەسۋالدىق شەشىم قابىلدانادى»، دەلىنگەن حابارلامادا.