مينيستر: 42500 تەڭگە الۋ ءۇشىن بانكتەن ارنايى ەسەپشوت اشۋدىڭ قاجەتى جوق
بۇل تۋرالى ورتالىق كوممۋنيكاتسيالار قىزمەتىندە وتكەن ونلاين بريفينگتە ايتىلدى، دەپ حابارلايدى قازاقپارات ءتىلشىسى.
«بانكتەر 42500 تەڭگە الۋ ءۇشىن ارنايى ەسەپشوت اشۋدى تالاپ ەتىپ جاتقانى تۋرالى سۇراق قويىلدى. بۇل - دۇرىس ەمەس. بۇل تۋرالى قارجىلىق نارىقتى رەتتەيتىن اگەنتتىك بارلىق بانكتەرگە نۇسقاۋلىق بەرىپ، تالاپ قويدى. 42500 تەڭگە الۋ ءۇشىن ارنايى ەسەپشوت اشۋدىڭ قاجەتى جوق، اقشا كەز كەلگەن كارتوچكالىق ەسەپشوتىڭىزعا اۋدارىلادى جانە تۇسكەن اقشادان قارىزدى وتەۋگە، نەسيە جابۋعا اقشا ۇستالمايدى. ولاي ەتۋگە بانكتەردىڭ قۇقىعى جوق»، - دەيدى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ. ول جەكە كاسىپكەر جالدامالى جۇمىسشىلارى بولماسا، ءوزى ءۇشىن ءوتىنىش بەرە الاتىنىن ايتتى.
«جەكە كاسىپكەر ءوزى ءۇشىن دە 42500 تەڭگە الۋعا ءوتىنىش بەرە الادى. مىسالى، جشس- نىڭ باسشىسى - سول ۇيىمنىڭ قىزمەتكەرى. سوندىقتان ول زاڭدى تۇلعا رەتىندە ءوتىنىش بەرە الماعانىمەن، جشس جۇمىسشىسى رەتىندە ءوتىنىش بەرە الادى»، - دەيدى ول.
اۆتور: زارينا قاھارمان