مەملەكەت باسشىسى: 42500 تەڭگە كولەمىندەگى كومەك الاتىن ازاماتتاردىڭ ساناتى كەڭەيتىلەدى
بۇل تۋرالى رەسپۋبليكالىق تەلەارنالاردىڭ ەفيرىنەن ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس- شارالارىنا بايلانىستى مالىمدەمەسىندە پرەزيدەنت قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«وسىعان وراي اتالعان ساناتتاعى ازاماتتاردىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەدى. تابىسىنان ايىرىلعان ازاماتتارعا ەڭ تومەنگى جالاقى مولشەرىندە قولداۋ كورسەتتىك. ەندى 42500 تەڭگە كولەمىندەگى كومەكتى الاتىن ازاماتتاردىڭ ساناتىن كەڭەيتۋدى تاپسىرامىن. سوعان وراي بۇل قولداۋعا ءوزىن- ءوزى جۇمىسپەن قامتىعاندار مەن رەسمي تىركەلمەي جۇمىس ىستەيتىندەر دە يە بولادى. بۇل كومەك بەلگىلىنگەن ءتارتىپ بويىنشا شىن مانىندە مۇقتاج ادامدارعا عانا بەرىلەدى. جالپى، 3 ميلليونعا جۋىق ازاماتىمىزعا قولداۋ كورسەتىلەدى» ، - دەدى مەملەكەت باسشىسى.
بۇعان دەيىن حابارلانعانداي، پرەزيدەنت زەينەتاقى، مەملەكەتتىك جاردەماقى جانە اتاۋلى الەۋمەتتىك كومەك مولشەرى 10 پايىزعا يندەكساتسيالاناتىنىن ءمالىم ەتتى.
«مەن بۇعان دەيىن داعدارىسقا قارسى العاشقى شارالار توپتاماسىن جاريالادىم. جاعدايدىڭ ۋشىعا تۇسكەنىن ەسكەرىپ، ازاماتتارعا جانە بيزنەسكە ودان ءارى قولداۋ كورسەتۋ جونىندە مىناداي قوسىمشا شەشىمدەر قابىلدادىم. ينفلياتسيانىڭ ارتۋىنا بايلانىستى، زەينەتاقى، مەملەكەتتىك جاردەماقى جانە اتاۋلى الەۋمەتتىك كومەك مولشەرىن 10 پايىزعا يندەكساتسيالاۋدى تاپسىردىم» ، - دەدى پرەزيدەنت.