قازاقستاندا 42500 تەڭگەلىك الەۋمەتتىك تولەمدى 3 ميلليونعا جۋىق ادام الا الادى

نۇر-سۇلتان. قازاقپارات - 42500 تەڭگەلىك الەۋمەتتىك تولەم 3 ميلليونعا جۋىق ادامعا بەرىلەدى.

بۇل تۋرالى ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

«پرەزيدەنتتىڭ تاپسىرماسى بويىنشا توتەنشە جاعدايعا بايلانىستى تابىس كوزىنەن ايىرىلعان ازاماتتارعا مەملەكەتتىك الەۋمەتتىك ساقتاندىرۋ قورىنان 42500 تەڭگە مولشەرىندە الەۋمەتتىك تولەم ەنگىزىلدى. بۇل تولەمگە اقىسىز دەمالىسقا شىعۋعا ءماجبۇرلى تۇردە جىبەرىلگەن جالدامالى قىزمەتكەرلەرمەن قوسا رەسمي جانە بەيرەسمي ءوز بەتىنشە جۇمىس ىستەپ جۇرگەن ازاماتتار قوسىلدى. وسىعان بايلانىستى ەگەر بارلىعى 3 ميلليون ادامعا دەيىن جەتىپ جاتسا، مەملەكەتتىك الەۋمەتتىك ساقتاندىرۋ قورىنان اي سايىنعى تولەمگە 127,5 ميلليارد تەڭگە باعىتتالدى. ازاماتتار تاراپىنان ءوتىنىش جاساۋ جولدارى مەن تاسىلدەرى بارىنشا قاراپايىم جاسالدى جانە قوسىمشا جاڭا تەحنيكالىق-سيفرلىق شەشىمدەر قاراستىرىلۋدا»، - دەدى ءبىرجان نۇرىمبەتوۆ.

جالپى، ءمينيستردىڭ ايتۋىنشا، ەل ازاماتتارىن جۇمىسپەن قامتۋ ءۇشىن «ەڭبەك» باعدارلاماسى ىسكە اسىرىلىپ جاتىر.

«بۇل باعدارلاماعا قوسىمشا 50 ميلليارد تەڭگە ءبولىنىپ، 136 مىڭ قوسىمشا جۇمىس ورنى اشىلادى. ايتا كەتەرلىگى، «ەڭبەك» باعدارلاماسى وسى جىلى 600 مىڭ ادامدى جۇمىسپەن قامتۋ شارالارىنا تارتۋعا الەۋەتى بار»، - دەدى ول.