قازاقستان قالالارىندا پاتەر باعاسى ءبىر جىلدا 41 پايىزعا دەيىن قىمباتتاعان

استانا. قازاقپارات - ءبىر جىلدا پاتەرلەردى قايتا ساتۋ باعاسى 13 پايىز، جاڭا تۇرعىن ءۇيدى ساتۋ قۇنى 14 پايىز ءوستى.

اباتتاندىرىلعان تۇرعىن ءۇيدى جالعا الۋ تولەمى وتكەن جىلعى ءتيىستى ايمەن سالىستىرعاندا 2023-جىلعى اقپاندا 33,8 پايىز ارتتى، دەپ حابارلايدى قازاقپارات ۇلتتىق ستاتبيۋروعا سىلتەمە جاساپ.

وڭىرلەر بولىنىسىندە جاڭا ۇيلەر نارىعىندا باعا جىلدىق ماندە اقتوبە (25,4 پايىز) جانە اقتاۋ قالالارىندا (25,2 پايىز) ەداۋىر قىمباتتادى.

پاتەرلەردى قايتا ساتۋ نارىعىنداعى باعا ءوسىمىنىڭ كوش باسىندا سەمەي (41 پايىز)، قىزىلوردا (39,9 پايىز)، اقتوبە (36,9 پايىز)، اقتاۋ (35,4 پايىز)، قوستاناي (30,9 پايىز) قالالارى تۇر.

ال تۇرعىن ءۇيدى جالعا الۋ بويىنشا جوعارى ءوسىم كوكشەتاۋ (53,7 پايىز)، قوستاناي (51,9 پايىز)، الماتى (49,6 پايىز) جانە پەتروپاۆل (49,3 پايىز) قالالارىندا تىركەلدى.