سۇرانىسقا يە ءدارى- دارمەكتىڭ 41 ءتۇرى باقىلاۋعا الىندى

پەتروپاۆل. قازاقپارات - سولتۇستىك قازاقستان وبلىسىنىڭ اكىمى قۇمار اقساقالوۆ بۇگىن وتكەن ونلاين بريفينگ بارىسىندا ءدارى- دارمەككە قاتىستى ماسەلەلەرگە توقتالدى، دەپ حابارلايدى قازاقپارات ءتىلشىسى.

ءوڭىر باسشىسىنىڭ ايتۋىنشا، ءدارى- دارمەك جەتىسپەۋشىلىگى، سۇرانىسقا يە پرەپاراتتار باعاسىنىڭ نەگىزسىز قىمباتتاۋ ماسەلەسى ەرەكشە باقىلاۋعا الىنعان. ونى اكىمدىك قانا ەمەس، كۇش قۇرىلىمدارى دا نازاردا ۇستاپ وتىر. وبلىستا مونيتورينگىلىك توپتار قۇرىلدى. ۆيرۋستىق اۋرۋلار مەن پنيەۆمونيانىڭ ورشۋىنە بايلانىستى سۇرانىسقا يە 41 ءتۇرلى ءدارى- دارمەك باقىلاۋعا الىندى.

«مونيتورينگىلىك توپتار ءدارىحانالاردى ۇنەمى تەكسەرىپ وتىر. سونداي- اق Play Market ارقىلى Dari.kz موبيلدىك قوسىمشاسىنا كىرىپ، تۇتىنۋشى ءدارىحاناداعى پرەپارات باعاسى دەنساۋلىق ساقتاۋ مينيسترلىگىنىڭ بۇيرىعىمەن بەكىتىلگەن باعاعا ساي كەلە مە، جوق پا - تەكسەرە الادى. ءبىراق، مينيسترلىك ءدارى- دارمەكتىڭ كەي تۇرلەرىنە عانا بەكىتىلگەن باعا ۇسىندى. سول سەبەپتى مونيتورينگىلىك توپتار جاعدايدى باقىلاۋدا ۇستاۋى كەرەك»، - دەدى قۇمار اقساقالوۆ.

مەملەكەت باسشىسىنىڭ تاپسىرماسىمەن قۇقىق قورعاۋ ورگاندارى الىپساتارلىقپەن اينالىسىپ جۇرگەندەردى انىقتاي باستادى. تەكسەرۋلەر س ق و- دا ءجۇرىپ جاتىر.

«بۇگىندە ءدارىحانالاردا ىستىق تۇسىرەتىن، قابىنۋعا، ۆيرۋستارعا جانە باكتەريالارعا قارسى پرەپاراتتاردىڭ بالامالارى تولىپ تۇر. ستاتسيونارلاردا دا قاجەتتى ءدارى- دارمەك جەتكىلىكتى. «س ك- فارماتسيامەن» جۇمىس جاقسى جولعا قويىلعان، ەندى ولارمەن پرەپاراتتاردى الدىن الا جەتكىزىپ تۇرۋ بويىنشا جۇمىستار جۇرگىزىلىپ جاتىر» ، - دەدى س ق و اكىمى.

قۇمار اقساقالوۆ بريفينگ بارىسىندا مەديتسينالىق قوندىرعىلاردىڭ جەتىسپەۋشىلىگى ماسەلەسىنە دە توقتالعان ەدى.