ەلىمىزدە جىل سايىن جۇرەك-قان تامىر اۋرۋلارى سالدارىنان 40 مىڭ ادام كوز جۇمادى
بۇل تۋرالى سەنات دەپۋتاتى اقمارال ءالنازاروۆا ايتتى، دەپ حابارلايدى قازاقپارات ءتىلشىسى.
«قازاقستان رەسپۋبليكاسى 2015 -جىلى بىرىككەن ۇلتتار ۇيىمىنىڭ باس اسسامبلەياسىندا قابىلدانعان 17 جاھاندىق تۇراقتى دامۋدىڭ ماقساتتارىنا قول جەتكىزۋ بويىنشا مىندەتتەمەلەردى قابىلدادى. تۇراقتى دامۋدىڭ ماقساتتارى قابىلدانعان ساتتەن باستاپ مەملەكەتىمىزدە ولاردى ىسكە اسىرۋدا وڭتايلى ناتيجە بايقالدى. الايدا، دەنساۋلىق ساقتاۋ سالاسىنداعى تۇراقتى دامۋ ماقساتتارىن قۇرايتىن 14 ينديكاتوردىڭ جەتەۋى ءتيىستى دەڭگەيدە ورىندالمادى»، - دەدى ا. ءالنازاروۆا سەناتتاعى ۇكىمەت ساعاتىندا دەنساۋلىق ساقتاۋ ماسەلەسىن تالقىلاۋ كەزىندە.
ونىڭ ايتۋىنشا، سونىڭ اراسىنداعى ماڭىزدى كورسەتكىشتەر قاتارىندا حالىقتىڭ ورتاشا ءومىر ءسۇرۋ ۇزاقتىعى، 30 دان 70 جاسقا دەيىنگى جاس توبىنداعا ادامداردىڭ جۇقپالى ەمەس اۋرۋلاردان ءولىمىن ازايتۋ، دەنساۋلىق ساقتاۋ قىزمەتىمەن حالىقتى جاپپاي قامتۋ ماسەلەسى بار.
قازاقستاندا قان اينالىمى جۇيەسى اۋرۋلارىنان بولاتىن ءولىم-دەڭگەيى جوعارى ەكەنىنە توقتالعان سەناتور: «جۇرەك-قان تامىر اۋرۋلارى سالدارىنان ادامدار مۇگەدەك بولىپ جاتادى. ەلىمىزدە جىل سايىن 40 مىڭنان استام ادام وسى ىندەتتەن قايتىس بولادى»، - دەدى.
ءوز كەزەگىندە «University Medical Center» كورپوراتيۆتىك قورى» باسقارماسىنىڭ ءتوراعاسى يۋري پيا الەم ەلدەرىندە جىل سايىن جۇرەك-قان تامىر اۋرۋلارىنان 19 ميلليونعا جۋىق ادام قايتىس بولاتىنىن ايتتى. ەلىمىزدە دە وسى اۋرۋ كەڭىنەن تارالىپ وتىر.