ەگدە جاستاعى قازاقستاندىقتاردىڭ 40 پايىزى عانا مەملەكەتتىك قىزمەتتەردى ءوز بەتىمەن پايدالانا الادى
29 ماۋسىم 20:56

ەگدە جاستاعى قازاقستاندىقتاردىڭ 40 پايىزى عانا مەملەكەتتىك قىزمەتتەردى ءوز بەتىمەن پايدالانا الادى

نۇر-سۇلتان. قازاقپارات - ەگدە جاستاعى قازاقستاندىقتاردىڭ 40 پايىزى عانا مەملەكەتتىك قىزمەتتەردى ءوز بەتىمەن پايدالانا الادى.

بۇل تۋرالى ق ر سيفرلىق دامۋ، يننوۆاتسيالار جانە ينفراقۇرىلىمدىق دامۋ مينيسترلىگى اقپاراتتىق تەحنولوگيالار سالاسىن دامىتۋ دەپارتامەنتى ديرەكتورىنىڭ ورىنباسارى داۋلەت دۋشابايەۆ ايتتى، دەپ حابارلايدى قازاقپارات ءتىلشىسى.

«2018، 2019، 2020-جىلدارى قازاقستاندىقتار 5 باعىت بويىنشا سيفرلىق ساۋاتتىلىق تالاپتارىن وقىدى. 2019-جىلى ەلەكتروندى مەملەكەتتىك قىزمەت تۇرلەرىن تەك 2,2 ميلليون قازاقستاندىق پايدالانا العان.

ال 2020-جىلى ولاردىڭ سانى 7 ميلليونعا دەيىن جەتسە، 2021-جىلى 13 ميلليون ادام ەلەكتروندى قىزمەتتەردى العان. بۇل جاقسى كورسەتكىش.

eGov-قا تىركەلگەن قولدانۋشىلار تۋرالى ايتساق، 2019-جىلى 516 مىڭ ادام تىركەلسە، 2021-جىلى - 6.6 ميلليون ادام تىركەۋدەن وتكەن»، - دەدى ۆەدومستۆو وكىلى.

ول ايتقان سيفرلىق ساۋاتتىلىق كۋرستارىنان 6-74 جاس ارالىعىنداعى ادامدار وتكەن.

«2020-جىلى ءبىز ادامداردى سيفرلىق ساۋاتىلىققا وقىتۋ قانشالىقتى ءتيىمدى دەگەن سۇراققا باس قاتىردىق. سول سۇراققا جاۋاپ تابۋ ءۇشىن ادامداردى ءۇش توپقا بولدىك. سيفرلىق ساۋاتتىلىقتىڭ دەڭگەيىن كوتەرەتىن باسقا جولداردى تاپقىمىز كەلدى. ءبىرىنشى توپ ءتۇرلى ساناتقا جاتاتىن ادامداردان ساۋالناما الىپ، ونشاقتى تەرەڭ سۇحباتتار جۇرگىزدى، حالىقارالىق تاجىريبەنى زەرتتەدى. ساۋالناماعا 25-75 جاس ارالىعىنداعى 3 مىڭداي ادام قاتىستى. قورىتىندىسى 65-70 جاس ارالىعىنداعى قازاقستاندىقتاردىڭ تەك %40 عانا مەملەكەتتىك قىزمەتتەردى پايدالانا الاتىنىن كورسەتتى.

65-75 ارالىعىنداعى قازاقستاندىقتار فاكتى مەن دەرەككوز سەنىمدىلىگىن تەكسەرە المايتىنىن مويىنداعان. ال 35-40 جاساراسىنداعى قازاقستاندىقتاردىڭ %66 فاكتىلەر مەن دەرەككوزدەردىڭ سەنىمدىلىگىن تەكسەرە الاتىندارىن ايتتى» - دەدى داۋلەت دۋشابايەۆ.


جاڭالىقتار