شىعىس قازاقستاندا ءبىر جارىم ايدان بەرى 40 قا جۋىق كولىك ورتەنگەن
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، وڭىردە ءبىر كۇن ىشىندە ەكى كولىك ورتەندى. العاشقى وقيعا ريددەر قالاسىندا تىركەلگەن.
«1998 -جىلعى «Lexus RX 300» اۆتوكولىگىن جالىن شارپىدى. وقيعا ورنىنا كەلىپ جەتكەن ءورت سوندىرۋشىلەر جالپى اۋماعى 2,5 شارشى مەترگە جەتكەن ءتىلسىز جاۋدى اۋىزدىقتاعان. الدىن الا مالىمەت بويىنشا ءورتتىڭ شىعۋ سەبەبى - قاۋىپتىلىگى جوعارى اگرەگاتپەن ابايسىز جۇمىس اتقارۋدان نەمەسە قاساقانا ورتەۋدەن بولۋى مۇمكىن»، - دەلىنگەن حابارلامادا.
سونداي-اق سەمەيدە جەكە تۇرعىن ءۇي اۋلاسىندا تۇرعان 1997 -جىلعى «Subaru Legacy» اۆتوكولىگى وتقا وراندى. جالپى اۋماعى 6 شارشى مەتردى قۇراعان جالىن كولىكتىڭ قوزعالتقىش بولىگىنە، سالونعا جانە الدىڭعى دوڭگەلەكتەرگە جايىلعان. ءورتتىڭ شىعۋىنا قاۋىپتىلىگى جوعارى اگرەگاتپەن ابايسىز جۇمىس اتقارۋ سەبەپ بولدى. ت ج د دەرەگىندە، جىل باسىنان بەرى وڭىردە 38 كولىك ورتەنگەن.
اۆتور: تالعاتجان مۇحامەتبەك ۇلى