قازگيدرومەت: قازاقستاننىڭ سولتۇستىگىندە 40 گرادۋس اياز بولادى

نۇر- سۇلتان. قازاقپارات - قازاقستان تەرريتورياسىنىڭ باسىم ايماقتارى اتموسفەرالىق فرونتالدى بولىكتەردىڭ اسەرىندە بولعاندىقتان تۇراقسىز اۋا راي ساقتالادى، قار جاۋادى، رەسپۋبليكانىڭ باتىسىندا جاۋىن- شاشىن كۇتىلەدى.

رەسپۋبليكا بويىنشا كەي جەرلەردە تۇمان، كوكتايعاق، جاياۋ بۇرقاسىن، جەلدىڭ كۇشەيۋى ساقتالادى، دەپ حابارلايدى قازگيدرومەت.

الماتى، قىزىلوردا، ماڭعىستاۋ، اتىراۋ، باتىس قازاقستان، سولتۇستىك قازاقستان وبلىستارىنىڭ كەي جەرلەرىندە تۇمان كۇتىلەدى، اتىراۋ وبلىسىندا - كوكتايعاق، ماڭعىستاۋ وبلىسىندا كۇندىز جەل 15-20 م/س- عا دەيىن كۇشەيەدى. اقتوبە وبلىسىنىڭ كەي جەرلەرىندە جاياۋ بۇرقاسىن، كوكتايعاق كۇتىلەدى.

جامبىل، تۇركىستان وبلىستارىنىڭ كەي جەرلەرىندە تۇمان، جاياۋ بۇرقاسىن، جەل 15-20 م/س، جامبىل وبلىسىندا تۇندە ەكپىنى 23-28 م/س كۇتىلەدى.

شىعىس قازاقستان، تۇندە قاراعاندى، كۇندىز قوستاناي وبلىستارىنىڭ كەي جەرلەرىندە جاياۋ بۇرقاسىن كۇتىلەدى، جەل 15-20 م/س كۇشەيەدى، قوستاناي، قاراعاندى وبلىستارىنىڭ كەي جەرلەرىندە تۇمان كۇتىلەدى. سولتۇستىك قازاقستان، پاۆلودار وبلىستارىندا، قوستاناي وبلىسىنىڭ سولتۇستىگىندە 40 گرادۋس قاتتى اياز كۇتىلەدى.