قازاقستان جاستارىنىڭ 40 پايىزدان استامى شەتەلگە كەتۋدى جوسپارلاۋدا - زەرتتەۋ

نۇر-سۇلتان. قازاقپارات - قازاقستاننىڭ كوممۋنيستىك حالىق پارتياسى نۇر-سۇلتان قالالىق فيليالىنىڭ ەكىنشى حاتشىسى ءدىلدا مايدانبەكوۆا جاستار ترەندىن زەرتتەۋ اياسىنداعى ساۋالناما ناتيجەسىن جاريا ەتتى، دەپ حابارلايدى قازاقپارات ءتىلشىسى.

«ەگەر دەموگرافيالىق كورسەتكىشتەرگە قارايتىن بولساق، حالىق سانى ارتىپ كەلەدى. بۇگىندە بىزدە 18,6 ميلليوننان استام ادام بار. حالىق سانى تابيعي ءوسىم ەسەبىنەن ارتۋدا. دەگەنمەن ەلدەن جاستاردىڭ كەتۋىنىڭ ارتا ءتۇسۋى الاڭداتارلىق جايت بولىپ وتىر.

جاستار ترەندتىن زەرتتەۋ اياسىنداعى ساۋالناما مالىمەتتەرىنە سايكەس، ولاردىڭ كوپشىلىگى قازاقستاننان كەتۋدى جوسپارلاۋدا. ناقتىراق ايتار بولساق، 15 پەن 29 جاس ارالىعىنداعى قازاقستاندىقتاردىڭ شامامەن 42 پايىزى شەتەلگە وقۋعا نەمەسە تۇراقتى تۇرۋعا كەتۋدى جوسپارلاپ ءجۇر»، - دەدى ول «اقىلدى جاستاردىڭ شەتەلگە كەتۋى. سەبەپتەرى جانە وعان قالاي قارسى تۇرۋعا بولادى؟» تاقىرىبىنداعى دوڭگەلەك ۇستەل بارىسىندا.

ونىڭ مالىمەتىنشە، شەتەلدە تۇرىپ ءبىلىم الىپ جاتقان جاستاردىڭ جارتىسىنا جۋىعى سول جاقتا قالىپ قويادى. ال شامامەن 40 پايىزى قىزىقتى جۇمىس ۇسىنعان جاعدايدا قازاقستانعا ورالۋى مۇمكىن. «قازاقستاندا ءومىر سۇرەتىن ورتا جاستاعىلار ورتاعا جاقسى بەيىمدەلگەن. ال مەملەكەتتىك قىزمەتتە، ءىرى بيزنەستە وزىنە ورىن جوق دەپ سانايتىن جاستار وزگە ەلدەرگە نازار سالىپ وتىر. كوشى-قون كوڭىل-كۇيىن ايقىندايتىن نەگىزگى فاكتورلار مىنالار: ءوزىنىڭ ماتەريالدىق ءال-اۋقاتىن جاقسارتۋ، كەلەشەكتىڭ، مانساپ جولىندا جوعارىلاۋ مەن دامۋدىڭ جوقتىعى، شەتەلدەگى ءبىلىم بەرۋ قىزمەتتەرىنىڭ جوعارى ساپاسى»، - دەدى ءدىلدا مايدانبەكوۆا.

ونىڭ اتاپ وتۋىنشە، قازاقستانداعى ورتا جانە جوعارى ءبىلىم ساپاسىنداعى پروبلەما قارجىلاندىرۋ دەڭگەيىمەن تىكەلەي بايلانىستى بولىپ وتىر.

«ماسەلەن، 2016 -جىلى جوعارى ءبىلىم بەرۋگە ارنالعان مەملەكەتتىك بيۋدجەتتىك شىعىستارى كۇندىزگى بولىمدە وقيتىن ءبىر ستۋدەنتكە 504 دوللاردى قۇرادى. سالىستىرمالى تۇردە ايتار بولساق، بۇل كورسەتكىش رەسەيدە 8,8 مىڭ، قىتايدا 3245، تۇركيادا 3590، وڭتۇستىك كورەيادا 9656، ا ق ش-تا 11319 دوللاردى قۇرايدى»، - دەدى ول.

اۆتور: مارلان جيەمباي