اسكەردە 40 قا جۋىق دۇنگەن بار: قورعانىس مينيسترلىگى دەپۋتاتتىڭ ءسوزىن جوققا شىعاردى

نۇر-سۇلتان. قازاقپارات – قازاقستاندا دۇنگەن ۇلتىنىڭ قىرىققا جۋىق جىگىتى اسكەردە بورىشىن وتەپ جاتىر.

بۇل تۋرالى قورعانىس مينيسترلىگى ءمالىم ەتتى دەپ حابارلايدى Sputnik قازاقستان.

بۇعان دەيىن ءماجىلىس دەپۋتاتى باقىتبەك سماعۇل ءوزىنىڭ Facebook-تەگى پاراقشاسىندا «بىردە-ءبىر دۇنگەن قازاق اسكەرىنىڭ قاتارىندا قىزمەت ەتپەيتىنى» تۋرالى جازعان.

«الەۋمەتتىك جەلىلەردە تاراعان دۇنگەندەردىڭ اسكەري قىزمەتتەن باس تارتاتىنى تۋرالى اقپارات شىندىققا جاناسپايدى.

قازاقستاندا دۇنگەن ۇلتىنان 40 قا جۋىق سارباز مەرزىمدى اسكەري قىزمەتىن اتقارىپ جاتىر.

جالپى 2019-جىلى 30 مىڭنان استام سارباز شاقىرىلدى، ونىڭ ىشىندە قازاقتار، ورىستار، تاتارلار، نەمىستەر، ۋكرايندار، ۇيعىرلار، وزبەكتەر جانە باسقا ۇلت وكىلدەرى بار»، - دەپ حابارلادى قورعانىس مينيسترلىگى.

سونىمەن قاتار، ۆەدومستۆو اسكەرگە شاقىرىلۋشىلاردى ىرىكتەۋ كەزىندە ولاردىڭ ۇلتى ەمەس، ءتان ساۋلىعى، پسيحولوگيالىق جانە مورالدىق ورنىقتىلىعى، جەكە قاسيەتتەرى باستى ولشەم رەتىندە قاراستىرىلاتىنىن اتاپ ءوتتى.

ەسكە سالا كەتەيىك، جامبىل وبلىسى قورداي اۋدانىندا 7- اقپان كۇنى جەرگىلىكتى تۇرعىندار اراسىندا بولعان جانجالدان العاشىندا 8 ادام قازا تاۋىپ، 40 تان اسا ادام ءارتۇرلى جاراقات الدى.

9- اقپاندا تاعى ەكى ادامنىڭ قايتىس بولعانى حابارلانىپ، جاپپاي تارتىپسىزدىكتەن كوز جۇمعاندار سانى 10 ادامعا جەتتى.

سوڭعى دەرەكتەرگە سايكەس، مەديتسينالىق كومەككە 178 قازاقستاندىق جۇگىنگەن. 19 قۇقىق قورعاۋ ورگاندارىنىڭ قىزمەتكەرلەرى زارداپ شەگىپ، ونىڭ جارتىسى وق جاراقاتىن العان.

اتالعان جاعدايدان سوڭ 25 قىلمىستىق ءىس قوزعالعان.

اتالمىش وقيعادان سوڭ مەملەكەت باسشىسىنىڭ بۇيرىعىمەن بىرنەشە لاۋازىمدى تۇلعا قىزمەتىمەن قوش ايتىسقان.