شىعىس قازاقستان: 40 مىڭ گەكتار جەر ەشكىمگە ساتىلمايدى
ونىڭ ايتۋىنشا، ەشقانداي جەر شەتەلدىك ينۆەستورلارىنىڭ قولىنا بەرىلگەلى تۇرعان جوق. جەر ساتىلمايدى.
«قازىرگى ۋاقىتتا ءۇرجار اۋدانىنىڭ اۋماعىندا 300 گەكتار جەر مەملەكەتتىك رەزەرۆتەن شىعارىلعان. وسى ەكى ۋچاسكەگە قۇس فابريكاسىن سالۋ جوسپارلانعان. اۋقىمدى قۇرىلىس جۇمىستارىنا قازاقستاندىقتارمەن قاتار شەتەلدىك ينۆەستورلار دا قاتىسا الادى. جەردى ساتۋ تۋرالى ەشقانداي اڭگىمە جوق. سونىمەن قاتار ءۇرجار اۋدانىندا 40 مىڭعا جۋىق گەكتار اۋىلشارۋاشىلىق تەلىمدەرى قۇس فابريكاسىنىڭ جەمشوپ قورىن قامتاماسىز ەتۋ ماقساتىنا مەملەكەت مەنشىگىندە ساقتالىپ تۇر»، - دەيدى ۆ. بارسۋكوۆا.
باسقارما باسشىسىنىڭ سوزىنە سەنسەك، جوعارىدا ايتىلعان 40 مىڭ گەكتار جەر بۇرىنعىداي مەملەكەت مەنشىگىندە قالا بەرمەك. اتالعان اۋماققا بولاشاقتا سالىناتىن قۇس فابريكاسىنىڭ ازىعى، ياعني تاۋىق جەمىنە ارنالعان ءداندى داقىلدار ەگىلەدى. زاڭ بويىنشا بۇل جەرلەر مەملەكەت مەنشىگىندە، سوندىقتان اتالمىش ۋچاسكەلەردى ساتۋعا نەمەسە شەتەلدىكتەرگە بەرۋگە ەشكىمنىڭ ەشقانداي قۇقىعى جوق. جەر تەك قانا قازاقستان ازاماتتارىنا نەمەسە شەتەلدىڭ قاتىسۋىنسىز زاڭدى تۇلعالارعا عانا بەرىلەدى.
«الەۋمەتتىك جەلىلەردە 40 مىڭ گەكتار جەردىڭ شەتەلدىكتەرگە بەرىلەتىنى تۋرالى اقپارات تاراپ، حالىق اراسىندا الۋان ءتۇرلى پىكىر ايتىلىپ جاتقانى بەلگىلى. ش ق و جەر قاتىناستارى باسقارماسى اتالمىش اقپاراتتىڭ جاڭساق ەكەنىن جانە ەشقانداي شىندىققا جاناسپايتىنىن مالىمدەدى»، - دەلىنگەن اكىمدىك تاراتقان حابارلامادا.