اقىلى جولداردان 40 ميلليارد تەڭگە جينالادى - رومان سكليار

None
None
استانا. قازاقپارات - ق ر يندۋستريا جانە ينفراقۇرىلىمدىق دامۋ ءمينيسترى رومان سكليار اقىلى جولداردان تۇسەتىن تابىستىڭ كولەمىن جاريالادى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، اۆتوموبيل جولدارىن كۇتىپ ۇستاۋ جانە ساقتاۋ ماقساتىندا اقى الۋ جۇيەسى ەنگىزىلىپ كەلەدى. بيىل قاڭتار ايىنىڭ سوڭىندا جالپى ۇزاقتىعى 471 شاقىرىم بولاتىن الماتى-قورعاس (295 شاقىرىم)، الماتى-قاپشاعاي (42 شاقىرىم) جانە استانا-تەمىرتاۋ (134 شاقىرىم) جول ۋچاسكەلەرىندە اقى الۋ جۇيەسى تولىق ىسكە قوسىلدى. وسى جىلدىڭ سوڭىندا بارلىق اقىلى جولداردان تۇسەتىن جىل سايىنعى قارجىنىڭ كولەمى شامامەن 5 ميلليارد 400 ميلليون تەڭگەنى قۇرايتىن بولادى.

«كەلەسى جىلى اقى الۋ جۇيەسىن تاعى 5 مىڭ 500 شاقىرىمعا جۇرگىزۋ جوسپارلانۋدا، ول اۆتوموبيل جولدارىن كۇتىپ ۇستاۋ شىعىندارىن ازايتۋعا مۇمكىندىك بەرەدى. 2022-جىلدىڭ سوڭىنا قاراي ۇزاقتىعى شامامەن 6 مىڭ 500 شاقىرىم جول اقىلى بولادى. ال ودان تۇسەتىن قارجى 40 ميلليارد تەڭگەگە جەتەدى دەگەن بولجام بار. اتالعان قارجى جولدىڭ ءوزىن-ءوزى كۇتىپ ۇستاۋ رەجيمىنە وتۋگە مۇمكىندىك بەرەدى»، - دەدى ر. سكليار ۇكىمەتتىڭ بۇگىنگى وتىرىسىندا.

ايتا كەتەيىك، وتىرىستا «نۇرلى جول» مەملەكەتتىك باعدارلاماسىن ىسكە اسىرۋ بارىسى قارالدى. بيىل 4400 شاقىرىم جولدى سالۋ جانە قايتا جاڭعىرتۋ جۇمىستارى جوسپارلانعان.

«قاراعاندىدان الماتىعا دەيىن جانە اقتوبەدەن رەسەي فەدەراتسياسىنىڭ شەكاراسىنا (استراحانعا) دەيىن قۇرىلىس جۇمىستارى باستالادى. جىل سوڭىندا قايتا جاڭعىرتىلعان 654 شاقىرىم اۆتوجول قوزعالىسىن اشۋ جوسپارلانۋدا. استانا-پاۆلودار (441 شاقىرىم)، شۋچينسك- زەرەندى (80 شاقىرىم)، بەينەۋ-اقجىگىت (85 شاقىرىم)، تاسكەسكەن-باقتى (20 شاقىرىم)، جەتىباي-جاڭاوزەن (73 شاقىرىم) جوبالارى بويىنشا جۇمىستار تولىعىمەن اياقتالادى»، - دەيدى ر. سكليار.

سوڭعى جاڭالىقتار