قالادا ءبىلىم العان اۋىل جاستارىنىڭ 40 پايىزى عانا اۋىلىنا ورالادى
بۇل تۋرالى بۇگىن س. سەيفۋللين اتىنداعى قازاق اگروتەحنيكالىق ۋنيۆەرسيتەتىندە وتكەن «ەكونوميكانىڭ ناقتى سەكتورى ءۇشىن ماماندار دايىنداۋداعى ۋنيۆەرسيتەت پەن جۇمىس بەرۋشىلەردىڭ سەرىكتەستىگى» تاقىرىبىنداعى رەسپۋبليكالىق فورۋمدا ايتىلدى.
شاراعا ءماجىلىس ءتوراعاسىنىڭ ورىنباسارى ۆلاديمير بوجكو، سەنات دەپۋتاتى راشيت اكيموۆ، س. سەيفۋللين اتىنداعى قازاتۋ اق باسقارما ءتوراعاسى اقىلبەك كۇرىشبايەۆ جانە دەپۋتاتتار مەن وزگە دە وتاندىق، شەتەلدىك اگروبيزنەس وكىلدەرى، قاۋىمداستىقتار، سونداي- اق قوعامدىق ۇيىم مەن ساياسي پارتيا وكىلدەرى قاتىستى.
فورۋم بارىسىندا ءسوز العان ءماجىلىس ءتوراعاسىنىڭ ورىنباسارى ۆلاديمير بوجكو قازاتۋ بازاسىندا اۋىل شارۋاشىلىعى ماماندارىن قايتا دايارلاۋعا بايلانىستى ارنايى كۋرستار اشۋ كەرەكتىگىن العا تارتتى. سەبەبى بۇگىنگى تاڭدا ەلدى مەكەندەردە ماماندار جەتكىلىكسىز. بولعان كۇننىڭ وزىندە زاماناۋي تەحنولوگيا نەگىزىندە جۇمىس جاساۋعا قابىلەتسىز. ول اۋىلدىق كۆوتا ارقىلى كەلىپ، ءبىلىم الىپ جاتقان جانە ءبىتىرىپ كەتكەن مامانداردى اۋىلعا قايتارۋ كەرەكتىگىن باسا ايتتى. ويتكەنى اۋىلدىق جەڭىلدىك ارقىلى ءبىلىم العان جاس مامان ءوز اۋىلىنا بارسا، اۋىل شارۋاشىلىعى سالاسىنداعى كادر تاپشىلىعىن ازايتۋعا سەپتىگىن تيگىزەرى ءسوزسىز.
«قازىرگى كۇنى اۋىل جاستارىنىڭ نەبارى 40 پايىزى ءوز اۋىلدارىنا ورالىپ، قىزمەتكە ورنالاسادى. ال قالعان 60 پايىزى قالالاردا قالىپ قويادى. بۇل - الاڭداتارلىق ماسەلە»، - دەدى ۆلاديمير بوجكو.