قازاقستاندا ەلەكتروندى ساۋدانىڭ جىلىنا 40 پايىزعا ءوسۋى كۇتىلۋدە
بۇل تۋرالى بۇگىن قوعامدىق كەڭەس وتىرىسىندا ق ر اقپارات جانە كوممۋنيكاتسيالار ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«اعىمداعى جىلى «تسيفرلىق قازاقستان» مەملەكەتتىك باعدارلاماسىن جۇزەگە اسىرۋدىڭ بەلسەندى فازاسىنا كوشتىك. بۇل ءۇشىن قاجەتتى جاعدايلار، ونىڭ ىشىندە سيفرلاندىرۋ جونىندەگى كوميسسيا قۇرىلىپ، بەس مەملەكەتتىك ورگاندا ۆيتسە- مينيسترلەردىڭ جەكە ۇستانىمى بەكىتىلدى. ولار ۆەدومستۆوداعى سيفرلاندىرۋعا جاۋاپ بەرەدى.
«زەردە» حولدينگى جانىنان سيفرلاندىرۋ جونىندەگى جوبالىق كەڭسە قۇرىلدى. ناقتى ناتيجەلەر تۋرالى ايتقان كەزدە، ەلەكتروندى ساۋدا سۋبەكتىلەرى سانىنىڭ ءوسىمىن ىنتالاندىراتىن سالىق كودەكسىنە وزگەرتۋلەر ەنگىزىلگەنىن اتاپ وتكەن ءجون. مۇنداي ۇيىمدار كورپوراتيۆتىك تابىس سالىعىن تولەۋدەن تولىقتاي بوساتىلعان. كەيبىر ەسەپتەۋلەرگە سايكەس، مۇنداي شارالار ەلەكتروندى ساۋدا نارىعىنىڭ جىلدىق ءوسىمىن 40 پايىزعا دەيىن قامتاماسىز ەتەدى»، - دەدى مينيستر.
سونىمەن قاتار ول قاڭتار ايىندا «ەلەكتروندى ەڭبەك بيرجاسى» جوباسى ىسكە قوسىلعانىن اتاپ ءوتتى.
«بۇل باعدارلاما اياسىندا مەملەكەتتىك سەكتوردى ەڭبەكپەن قامتۋ جونىندەگى جەكە اگەنتتىكتەرمەن ىقپالداستىرعان ءارى ازاماتتاردىڭ جۇمىسقا ورنالاسۋ پروتسەسىن اشىق جانە جەدەل جاساعان ءبىرىنشى جوبا بولدى. «ەلەكتروندى ەڭبەك بيرجاسى» قازىردىڭ وزىندە شامامەن 70 مىڭ ادامنىڭ جۇمىسقا ورنالاسۋىنا سەپتىگىن تيگىزدى» ، - دەدى د. ابايەۆ.
ءمينيستردىڭ ايتۋىنشا، «استانا حاب» IT- ستارتاپتاردىڭ حالىقارالىق تەحنوپاركى اكسەلەراتسيا باعدارلاماسى اياسىندا 10 جوبا ىسكە قوسىلدى. جىلدىڭ سوڭىنا دەيىن مۇنداي جوبالاردىڭ سانىن 33-كە جەتكىزۋ جوسپارى بار. جالپى، وسى جىلدىڭ جاز ايلارىندا اشىلادى.